Երեւանի Կոմիտաս-Գյուլբենկյան խաչմերուկում գտնվող HSBC բանկի վրա տեղի ունեցած հարձակման ժամանակ վիրավորվածներից մեկը տեղափոխվել է «Գրիգոր Լուսավորիչ» բժշկական կենտրոն:

NEWS.am-ին հիվանդանոցից հայտնեցին, որ իրենց մոտ տեղափոխված 24-ամյա երիտասարդն այժմ վիրահատվում է: Նա վիրավորում է ստացել կրծքավանդակի շրջանում: Ըստ տեղեկությունների, այնտեղ տեղափոխվածը ոստիկանության աշխատակից է:

Երկրորդը վիրավորը տեղափոխվել է «Արմենիա» բժշկական կենտրոն: Նրան նույնպես վիրահատում են: Այլ մանրամասներ այս պահին հայտնի չեն:

Ավելի վաղ ոստիկանությունը հայտնել էր, որ մայիսի 3-ին, ժամը 14.25-ի սահմաններում ոստիկանություն ահազանգ է ստացվել, որ HSBC բանկի` Կոմիտասի պողոտա-Գյուլբենկյան փողոց խաչմերուկում գտնվող մասնաճյուղի վրա ավազակային հարձակում է կատարվել: հարձակման հետեւանքով կա 1 զոհ, 2 վիրավոր:

Պարզվել է, որ ավազակային հարձակում կատարած անձը, դանակով, նռնակով, հրացանով զինված, ներխուժել է բանկ, վիրավորել երկու աշխատակցի, որոնցից մեկը մահացել է: Ավազակային հարձակում կատարած անձը հափշտակել է գումար ու դիմել փախուստի, սակայն հեռու փախչել չի հաջողվել:

Անհապաղ դեպքի վայր ժամանած օպերատիվ խմբի կողմից շրջափակվելով` նա դիմադրություն է ցույց տվել, վիրավորել ոստիկաններից մեկին, սակայն իրավապահներին հաջողվել է արագորեն վնասազերծել ու տեղափոխել ոստիկանություն:

Պարզվել է, որ հանցագործություն կատարած անձը Ճանապարհային ոստիկանության տեսանկարահանման միջոցով հայտնաբերված խախտումների արձանագրման կենտրոնի պետ, ոստիկանության գնդապետ Դանիել Դանիելյանն է:

HSBC բանկի վրա հարձակված անձը ոստիկանության գնդապետ է (Ֆոտո)