Լեռնային Ղարաբաղի խնդիրը միշտ եղել է, կա ու կլինի, իսկ Ադրբեջանի եւ Ղարաբաղի սահմանին ռազմական տեխնիկայի կուտակումը զինվորականների տեսանկյամբ բնական գործընթաց է եւ նորմալ երեւույթ: Այս մասին մայիսի 4-ին լրագրողների հետ հանդիպման ժամանակ ասաց Կովկաս ինստիտուտի տնօրեն, քաղաքագետ Ալեքսանդր Իսկանդարյանը:
Նրա կարծիքով՝ Լեռնային Ղարաբաղի վրա Բաքուն չհամարձակվեց հարձակվել մի քանի պատճառով: «Դա միջազգային հանրության ճնշումն էր, որը կոնսոլիդացված էր: Ես հիմա խոսում եմ ե՛ւ ամերիկացիների, ե՛ւ եվրոպացիների, ե՛ւ ռուսների մասին: Լարվածություն չեղավ նաեւ այն պատճառով, որ հայերի վրա հարձակվելով՝ ադրբեջանցիները կարող էին դրանով նրանց համախմբմանը նպաստել: Իսկ նման շահագրգռություն նրանք չունեն»,- պարզաբանեց Իսկանդարյանը: Միաժամանակ, նա հավելեց, որ ադրբեջանցիները կարող էին հարձակվել միայն այն դեպքում, եթե Հայաստանում իրավիճակը վերահսկողությունից դուրս գար:
Ալեքսանդր Իսկանդարյանի կարծիքով՝ շատ կարեւոր հանգամանք է նաեւ այն, թե Հայաստանում ապագայում ինչպխիսին կլինի ուժային բլոկը: Քաղաքագետը համոզված է, որ ղարաբաղյան հակամարտությունը չի կարգավորվի՝ անկախ Հայաստանում իշխանության եկած անձից, քանի որ կողմերն արդեն վաղուց դադարել են այս հարցը լուծել, եւ գործընթացն անցել է գործող ստատուս քվոյի պահպանման ու ամրապնդման փուլ:
