Հավայի խոշորագույն կղզում սկսվել է Կիլաուեա հրաբխի արտաժայթքումը, որը հեռու չէ Լեիլանի-Էսթերյթս բնակավայրից, որտեղ բնակվում է մոտ 1700 մարդ, փոխանցում է BBC-ն:
Կղզում արտակարգ դրություն է հայտարարվել, իրականացվում է բնակիչների տարհանում: Ինչպես հայտնել է տեղական Քաղաքացիական պաշտպանության գործակալությունը, տարհանման գոտում գրանցվել է ծծումբի երկօքսիդի շատ բարձր մակարդակ, որը բնակչությանը սպառնալիք է ներկայացնում:
Կիլաուեայի կողմնային խարամակոնը փլուզվել էր շաբաթվա սկզբին, եւ լանջով լավան սկսել էր հոսել բնակելի թաղամասերի ուղղությամբ:
Վերջին ամբողջ շաբաթվա ընթացքում իշխանությունների տեղի բնակիչներին նախազգուշացնում էին տարհանմանը պատրաստ լինելու անհրաժեշտության մասին, քանի որ գիտնականները զգուշացնում էին, որ հրաբուխը սպասվող արտաժայթքման ակնհայտ նշաններ չի տա:
Կիլաուեա հրաբուխը համարվում է աշխարհում ամենաակտիվներից մեկը: Այն ժայթքել է 2008, 2011, 2014 եւ 2017 թվականներին: