HSBC բանկի Կոմիտասի փողոցում գտնվող մասնաճյուղը, որտեղ նախօրեին զինված հարձակում էր եղել, դեռ մի քանի օր չի աշխատի: Այս մասին հաղորդագրություն է տարածել բանկը:
Հաղորդագրությունում, մասնավորապես, ասվում է. «Ս.թ. մայիսի 3-ին՝ ժամը 14:19-ին, ավազակային հարձակում է տեղի ունեցել էյչ-էս-Բի-Սի Բանկ Հայաստանի (այսուհետ՝ Բանկ) Երեւանի Կոմիտաս մասնաճյուղի վրա (հասցե՝ Կոմիտաս պողոտա 3): Ոստիկանության եւ անվտագնության ծառայություն մատուցող ընկերության աշխատողների օպերատիվ գործողությունների արդյունքում հարձակումը կասեցվել է: Ավազակային հարձակումն իրականացրած անձը բերման է ենթարկվել: Նա բանկի հաճախորդ չի հանդիսանում:
Բանկն իր ցավակցությունն ու զորակցությունն է հայտնում ավազակային հարձակման ժամանակ իրենց ծառայողական պարտականություններն իրականացնելիս զոհված անվտանգության ծառայություն մատուցող ընկերության աշխատակցի եւ ոստիկանի ընտանիքներին ու հարազատներին: Բանկի աշխատակազմը նաեւ շուտափույթ ապաքինում է մաղթում անվտանգության ծառայություն մատուցող ընկերության՝ վիրավորում ստացած աշխատակցին: Բանկը մեծապես գնահատում է նրանց անձնազոհությունը՝ աշխատակիցների եւ հաճախորդների անվտանգությունն ապահովելու համար եւ շնորհակալություն է հայտնում նաեւ հոգացավ քաղաքացիներին իրենց օժանդակության համար:
Իրավապահ մարմինները վերահսկում են իրավիճակը եւ իրականացնում են քննչական գործողություններ: Բանկի աշխատակիցներ եւ հաճախորդներ չեն տուժել: Բանկին եւ հաճախորդներին որեւէ ֆինանսական եւ նյութական վնաս չի հասցվել: Գողացված գումարը վերադարձվել է բանկ:
Կոմիտասի մասնաճյուղը իրադարձություններից ելնելով՝ կվերսկսի հաճախորդների սպասարկումը երկուշաբթի օրվանից՝ մայիսի 7-ից: Բանկի մնացած մասնաճյուղերը գործում են ըստ ստանդարտ աշխատանքային գրաֆիկի»:
