Տավուշի մարզի զորամասերից մեկում զինծառայողին մահացած են գտել: 20-ամյա Արթուր Գասպարյանի դին հայտնաբերել են կեսգիշերն անց, գլխի շրջանում մահացու հրազենային վիրավորումով: Գասպարյանը Կոտայքի մարզի Եղվարդ քաղաքից էր, 1.5 տարվա զինծառայող: Նա ընտանիքի միակ որդին էր, քույր ունի: Քննչական կոմիտեի փոխանցմամբ՝ շարքային զինծառայողը մահացել է բերանի խոռոչի շրջանում ստացած մահացու վիրավորումից: Քրեական գործ է հարուցվել, դատաբժշկական փորձաքննություն է նշանակվել: Իրավապահները քննում են մահվան հնարավոր վարկածները:
Ազգային ժողովն այսօր Սահմանադրական դատարանի անդամի էր ընտրում: Նախագահ Արմեն Սարգսյանն առաջադրել էր Էմիլ Բաբայանի թեկնածությունը: Ընտրվելու համար անհրաժեշտ էր 63 կողմ ձայն, սակայն Բաբայանի օգտին քվեարկել է 53 պատգամավոր, դեմ՝ 3-ը: «Ծառուկյան» եւ «Ելք» խմբակցությունները բոյկոտել էին քվեարկությունը: Էդմոն Մարուքյանը բացատրել է՝ ընթացակարգային խնդիրներ կային:
Ինչ վերաբերում է մայիսի 8-ին կայանալիք վարչապետի ընտրությանը. «Ելք»-ում հույս ունեն, որ հանրապետականները կհետեւեն խմբակցության որոշմանը, եւ Ազգային ժողովը կկարողանա վարչապետ ընտրել: Էդմոն Մարուքյանն ասում է՝ Նիկոլ Փաշինյանն այդպիսով կդառնա փոքրամասնության վարչապետ, եւ վստահեցնում, որ նրա գլխավորած ժամանակավոր կառավարությունը կկարողանա լուծել իր առջեւ դրված խնդիրները: Թեեւ հանրապետական որոշ պատգավորներ պնդում են, որ քվեարկելու են այնպես, ինչպես մայիսի 1-ին, ՀՀԿ խմբակցության ղեկավարը վստահեցնում է, որ օժանդակելու են Փաշինյանի ընտրությանը:
Պատգամավորական մանդատը վայր դնելու պահանջից հետո ՀՅԴ Հայաստանի Գերագույն մարմինը Աղվան Վարդանյանին նաեւ կուսակցությունից հեռացնելու որոշում է կայացրել:
Արձագանքելով որոշմանը՝ Վարդանյանը հայտարարել է, որ «ժողովուրդը, հավաքանակությունները դժվար են հանդուրժում սեփական տեսակետ ունեցողներին»: «Ազգային ժողովում իմ վերջին՝ խղճով ու համոզմունքով ելույթ-կեցվածքն անհատական պատասխանատվության դրսեւորում էր՝ Դաշնակցությանը տված երդմանս հավատարիմ: Մնացածը տասներորդական է»,- հավելել է Աղվան Վարդանյանը:
Պատճառը, հիշեցնենք, մայիսի 1-ին Ազգային ժողովում Վարդանյանի հայտարարությունն էր, որ թեեւ Դաշնակցությունը որոշել է քվեարկել Նիկոլ Փաշինյանի օգտին, բայց ինքը չի անի: Երեկ էլ խմբակցության քարտուղարը մանդատից հրաժարվելու դիմում էր ներկայացրել: Ի դեպ՝ մամուլի տեղեկություններով, Վարդանյանը վաղուց խնդիրներ ունի կուսակցության ղեկավար Հրանտ Մարգարյանի հետ, եւ վերջինի համար սա պարզապես լավ առիթ էր՝ նրան ՀՅԴ-ի շարքերից հեռացնելու համար:
Երեւանում 26-ամյա երիտասարդի են սպանել: Ոստիկանությունն ահազանգը ստացել է կեսգիշերն անց: Շենգավիթում իրավապահները հայտնաբերել են 26-ամյա Գոռ Գասպարյանի դին՝ սուր կտրող-ծակող առարկայից ստացած հարվածի 3 հետքով, որից մեկը՝ սրտի հատվածում: Սպանության մեջ կասկածվողին արդեն հայտնաբերել են. բերման է ենթարկվել 23-ամյա Ռազմիկ Ն.-ն:
Նոր Արեշում վիճաբանության ժամանակ էլ հրազենային վիրավորում է ստացել 29-ամյա մի երիտասարդ: Երեւանի բնակիչ Հ.Ավագյանին հրազենային կույր վնասվածքով եւ պատռվածքով հիվանդանոց են հասցրել: Սպանության փորձի մեջ կասկածվողին որոնում են:
2018 թվականի Ֆուտբոլի աշխարհի առաջնության առիթով Ռուսաստանի որոշ քաղաքներում, որտեղ տեղի են ունենալու առաջնության հանդիպումները, հատուկ ռեժիմ է սահմանվելու: Այն կգործի մայիսի 25-ից մինչեւ հուլիսի 28-ը: Հատուկ ռեժիմ է սահմանվելու, մասնավորապես, Վոլգոգրադ, Եկատերինբուրգ, Կազան, Կալինինգրադ, Մոսկվա, Նիժնի Նովգորոդ, Դոնի Ռոստով, Սամարա, Սանկտ Պետերբուրգ, Սարանսկ, Սոչի քաղաքներում: Անվտանգության միջոցառումներից ելնելով՝ oտարերկրյա, այդ թվում՝ Հայաստանի քաղաքացիները պարտավոր են Ռուսաստանի նշված քաղաքներ մուտք գործելուց հետո 24 ժամվա ընթացքում հաշվառվել ՆԳ նախարարության համապատասխան տարածքային մարմնում: Անգամ փոքր իրավախախտումները կարող են խիստ միջոցների կիրառման պատճառ դառնալ:
Հավայան խոշորագույն կղզում ակտիվացել է Կիլաուեա հրաբուխը: Այն 45 մետր բարձրությամբ լավայի սյուներ է ժայթքել: Կղզում արտակարգ դրություն է հայտարարվել, շրջակա տարածքների բնակչությանը տարհանում են. արդեն 1.500 մարդ լքել է տները: Կիլաուեա հրաբուխը հատուկ տեղ ունի հավայան դիցաբանության մեջ. տեղաբնակները հավատում են, որ այնտեղ բնակվում է կրակի եւ հրաբխի աստվածուհի Պելեն: Հավելենք, որ Կիլաուեա հրաբուխը համարվում է աշխարհում ամենաակտիվներից մեկը: Այն ժայթքել է նաեւ 2008, 2011, 2014 եւ 2017 թվականներին:
Մայիսի 4-ին դոլարն աննշան աճել է, եվրոն՝ էժանացել: Դոլարի փոխարժեքը կազմել է 484 դրամ, եվրոյինը՝ 579, ռուբլունը՝ 7 դրամ 65 լումա, ֆունտինը՝ 657 դրամ:
Մայիսի 5-ին հանրապետության շրջանների զգալի մասում ժամանակ առ ժամանակ սպասվում է անձրեւ եւ ամպրոպ, առանձին վայրերում՝ կարկուտ: Օդի ջերմաստիճանն էապես չի փոխվի: Երեւանում նույնպես վաղը տեղումներ կլինեն: Մայրաքաղաքում գիշերը կդիտվի +14+16, ցերեկը՝ +25+27 աստիճան տաքություն: