«Արաբական գարնանից» հետո Թունիսում առաջին տեղական ընտրությունների քվեարկության նախնական արդյունքները վկայում են «Ան Նահդա» («Վերածննդի շարժում») իսլամական կուսակցության հաղթանակի մասին, հայտնում է «ՌԻԱ Նովոստի»-ն՝ վկայակոչելով Թունիսի պաշտոնական հեռուստաալիքը։
Ըստ նախնական տվյալների՝ «Ան Նահդա»-ն ստացել է ընտրողների ձայների 27,5 տոկոսը, իսկ ընտրություններում նրա գլխավոր մրցակիցը՝ «Նիդաա Թունիս» կուսակցությունը, 22 տոկոսը։
Ընտրատեղամասերում ձայների հաշվարկից հետո «Ան Նահդայի» ղեկավարներից մեկը՝ Լյուտֆի Զեյթունը, հայտնել է, որ կուսակցությունը ընտրություններում հաղթել է «Նիդաա Թունիսին» շուրջ 5 տոկոսի տարբերությամբ։ «Մեր հաղթանակը պարգեւատրություն է կուսակցության բաց դիրքորոշման, համաձայնություն ու ժողովրդավարական ուղիներ որոնելու համար»,- նշել է նա։
Ընտրողների ձայների հաշվարկը սկսվել է Թունիսում ընտրատեղամասերի փակումից հետո՝ տեղական ժամանակով 18։00-ին։
2011-ին Թունիսը արաբական երկրներից առաջինն էր, որտեղ անցկացվել են բողոքի զանգվածային ցույցեր, դրանք արդյունքում հանգեցրել են նախագահ Զին ալ-Աբեդին Բեն Ալիի պաշտոնանկությանը, որը ղեկավարում էր երկիրը 1987-ից սկսած։ Դրանից հետո Թունիսում 2014-ին կայացել էին նախագահական ու խորհրդարանական ընտրություններ։
Տեղական ընտրություններին, որոնք վերջին անգամ երկրում անցկացվել էին 2010-ին, մասնակցում են թե՛ կուսակցությունների ներկայացուցիչներ, թե՛ անկախ թեկնածուներ։ Ենթադրվում է, որ ընտրված տեղական խորհուրդները կստանան զգալի լիազորություններ իրենց շրջաններում։