Սանկտ Պետերբուրգում Վլադիմիր Պուտինի նախագահական չորրորդ ժամկետի դեմ «Նա մեր ցարը չէ» բողոքի ցույցի ավելի քան 40 մասնակիցներ դատարանի որոշմամբ կալանավորվել են, փոխանցում է «Ազատություն» ռադիոկայանը:

Կիրակի դատարանները վարչական կալանքի եւ տուգանքների 85 որոշում են ընդունել, այդ թվում՝ խոշոր չափի, մինչեւ 170 հազար ռուբլի: Բոլոր ամբաստանյալների վերաբերյալ ավելի վաղ արձանագրություններ էին կազմվել ոստիկանության աշխատակցի օրինական պահանջին չենթարկվելու եւ հանրահավաքի կազմակերպման կամ անցկացման սահմանված կարգի խախտման մասին:

25-ամյա պետերբուրգցի Միխայիլ Ցակունովի դեմ քրեական գործ է հարուցվել ոստիկանության աշխատակցի նկատմամբ բռնություն կիրառելու հոդվածով: Իրավապահ մարմինների վարկածով՝ նա կոտրել է ոստիկանի ատամը: «Օտկրիտայա Ռոսիա» շարժումը իր տելեգրամ ալիքում հրապարակել է մայիսի 5-ի ակցիայի ժամանակ Միխայիլ Ցակունովի ձերբակալման տեսանյութը:

«ՕՎԴ-Ինֆոյի» տեղեկություններով՝ Ռուսաստանի 27 քաղաքներում ձերբակալվել է 1600 մարդ: Ամենաշատը՝ Մոսկվայում (719 ձերբակալված), Պետերբուրգում (217) եւ Չելյաբինսկում (185): Նրանցից մի մասին ազատել են: Ոմանց կալանավորել են, մյուսներին դատավարություն է սպասում: Չի բացառվում, որ ոմանց դեմ քրեական գործեր կհարուցվեն՝ «Բոլոտնոյա գործի» նման: Ալեքսեյ Նավալնու դեմ դատը, որը ձերբակալվել է մայիսի 5-ին Մոսկվայի կենտրոնում, նշանակված է մայիսի 11-ին:

Ռուսաստանի նախագահին առընթեր մարդու իրավունքների խորհրդի ղեկավար Միխայիլ Ֆեդոտովը խոստացել է իրավապահ մարմիններ հարցումներ ուղարկել՝ պարզելու համար, թե ինչու են, այսպես կոչված, կազակները եւ «Ազգային-ազատագրական շարժում» հայրենասիրական կազմակերպության անդամները մասնակցել մայիսի 5-ին Մոսկվայում բողոքի ակցիաների ժամանակ կարգի հաստատմանը: Ֆեդոտովի խոսքով՝ նրանց ներկայաթյունը իրադրությունը լարել է եւ հանգեցրել կազակական համազգեստով մարդկանց եւ ցույցի մասնակիցների բախման:

Նախօրեին The Bell պարբերականը հայտնել էր, որ Մոսկվայում ցույցի մասնակիցների վրա հարձակված, այսպես կոչված, կազակները հանարահավաքները ցրելու գործողությունների ուսուցման համար ֆինանսավորվել են Մոսկվայի իշխանությունների կողմից:

Ընդդիմադիր Նիկոլայ Լյասկինին ազատել են: Նա մայիսի 5-ին ձերբակալվել էր «Ազատություն» ռադիոկայանի Մոսկվայի բյուրոյից դուրս գալիս: Ընդդիմադիրը մասնակցել էր «Օն նամ նե ցար» ակցիային նվիրված «Իսկական ժամանակ» հեռուստահաղորդման ծրագրին: