Առաջին կարեւոր քայլն ընտրական համակարգի բարեփոխումների մեկնարկն է, եւ մենք այդ ուղղությամբ անպայման միջոցներ կձեռնարկենք: Այս մասին այսօր՝ մայիսի 8-ին ԱԺ-ում լրագրողների հետ զրույցում նշեց քիչ առաջ ՀՀ վարչապետ ընտրված Նիկոլ Փաշինյանը:
Նրա խոսքով՝ առաջին գործը, որով զբաղվելու է վարչապետի պաշտոնում, երկրի անվտանգության միջավայրի վերաբերյալ զինված ուժերի եւ ազգային անվտանգության մարմինների ներկայացուցիչների զեկույցները լսելն է: «Բոլոր ոլորտներում ունենք առաջարկներ, բայց այդ առաջարկները կպարզվեն զեկույցները լսելուց եւ ինֆորմացիային տիրապետելուց հետո»,- ասաց նա:
Փաշինյանը հստակ չնշեց, թե վարչապետի ո՞ր լիազորություններն է կրճատելու. «Սուպեր վարչապետական համակարգ պետք է չլինի, եւ մենք կաշխատենք այդ ուղղությամբ»: Նա անդրադարձավ նաեւ ՀՀԿ խմբակցության պատգամավոր Ֆելիքս Ցոլակյանին ԱԱԾ տնօրեն նշանակելու վերաբերյալ խոսակցություններին՝ նշելով, որ նա ԱԱԾ տնօրենի պաշտոնում իր թեկնածուն չէ:
Վարչապետը տեղեկացրեց, որ վաղը՝ մայիսի 9-ին մեկնելու է Արցախ:
Նշենք, որ այսօր՝ մայիսի 8-ին, ԱԺ հատուկ նիստում վարչապետ ընտրվեց «Ելք» խմբակցության ղեկավար Նիկոլ Փաշինյանը: Նա ստացավ 59 կողմ, 42 դեմ ձայներ:
