Նիկոլ Փաշինյանի՝ վարչապետի պաշտոնում ընտրվելուց հետո, Ամերիկայի Հայ դատի հանձնախումբը ԱՄՆ պետքարտուղար Մայք Պոմպեոյին կոչ է արել աջակցել Հայաստանում աննախադեպ, խաղաղ եւ սահմանադրական իշխանափոխությունը հաջողությամբ ավարտին հասցնելուն՝ արագացված կարգով քննարկելով «Հազարամյակի մարտահրավեր» կորպորացիայի միջոցով 140 միլիոն դոլարի դրամաշնորհ տրամադրելու հնարավորությունը: Այդ դրամաշնորհը կուղղվի երկրի հանրակրթական դպրոցների գիտական, տեխնոլոգիական, ճարտարագիտական, արվեստի եւ մաթեմատիկայի կրթական ծրագրերին:
«Հիմա գործելու լավագույն ժամանակն է։ «Հազարամյակի մարտահրավեր» կորպորացիան Հայաստանի ժողովրդավարական զարգացման պահին կարող է կենտրոնական դեր խաղալ ԱՄՆ–Հայաստան հարաբերությունների նոր գլխում։ Մենք կոչ ենք անում անհապաղ նախաձեռնել STEAM նոր փաթեթի քննարկումը։ Այդպիսի համաձայնագիրը կձեւափոխվի շատ մակարդակներում՝ ընդլայնելով տղաների եւ աղջիկների նոր սերնդի հնարավորությունները կրթության բարելավման եւ ապագայում ներուժի ավելացման, մեր տնտեսական համագործակցության ամրապնդման եւ ավելի լայն առումով բարեկամության կայուն կապերի ամրացման առումով, որոնք վաղուց կապում են ամերիկացի եւ հայ ժողովուրդներին»,–նշված է Պոմպեոյին ուղղված Ամերիկայի Հայ դատի հանձնախմբի նախագահ Րաֆֆի Համբարյանի նամակում։
Հիշեցնենք, 2006 թվականին «Հազարամյակի մարտահրավեր» կորպորացիան ծրագրել էր Հայաստանին հատկացնել մոտ 235 միլիոն դոլար` ոռոգման համակարգերի և գյուղական ճանապարհների շինարարության համար: 2009-ին, այդուհանդերձ, կորպորացիայի տնօրենների խորհուրդը որոշեց դադարեցնել մոտ 60 միլիոն դոլար արժողությամբ ճանապարհաշինության ծրագրի ֆինանսավորումը` պայմանավորված մի շարք քաղաքական ցուցանիշների գծով Հայաստանի կատարողականի վատթարացմամբ: Շարունակվեց և ավարտին հասցվեց միայն ոռոգման համակարգերի կառուցման ծրագիրը:
