Այս պահին պետք է կենտրոնանք այն խնդրի վրա, որ Հայաստանում վերջապես կայանան ազատ եւ արդար ընտրություններ։ Այս մասին, այսօր՝ մայիսի 9-ին, Հաղթանակի զբոսայգում լրագրողների հետ զրույցում նշեց ՀԱԿ փոխնախագահ Լեւոն Զուրաբյանը:
Նրա խոսքով, ազատ եւ արդար ընտրություններ ասելով իրենք հասկանում են, որ դրանք կայանան մաքուր համամասնական համակարգով՝ բացառելով կոռումպացված ռեյտինգային համակարգը, որ բացառվի ընտրակաշառքի բաժանումը որեւէ քաղաքական ուժի կողմից. «Իսկ հավակնողներ շատ կլինեն, քայլեր արվեն, որ գործարարները չմտնեն պառլամենտ եւ գործադիր մարմին՝ ստեղծելով շահերի բախում: Թող քաղաքականությամբ զբաղվեն գաղափարական մարդիկ, բիզնեսմենները թող զբաղվեն բիզնեսով։ Դա մինչեւ չկատարվի, մենք այս արատավոր շրջանից դուրս չենք գա»:
Զուրաբյանը նշեց, որ պետք է ստեղծվի նախնական գրանցման համակարգը, որ ընտրությանը մասնակցող ամեն մարդ նախապես գրանցվի. «Եթե բոլոր այս քայլերն արվեն, ապա պետք է գնալ արտահերթ ընտրությունների։ Ես չեմ համարվում քաղաքական ճգնաժամը լուծված, քանի որ չի կարող քաղաքական ճգնաժամը լուծված համարվել, երբ ունենք ոչ լեգիտիմ, ժողովրդի կողմից չընտրված պառլամենտ, որը ցանկացած հարցով ինչ ասես կարող է անել՝ չարտահայտելով ժողովրդի կամքը»:
Հարցին, թե արդյոք Հայ ազգային կոնգրեսը կմասնակցի՞ արտահերթ խորհրդարանական ընտրություններին, Լեւոն Զուրաբյանը զարմացավ. «Ինչո՞ւ է ձեզ մոտ այդպիսի հարց ծագել։ Ինչո՞ւ եք կարծում, որ կարող է այնպիսի դեպք լինել, որ ՀԱԿ–ը չմասնակցի ընտրություններին»։