Ես պատրաստ եմ ԵԱՀԿ Մինսկի խմբի շրջանակներում ղարաբաղյան հակամարտության կարգավորման հարցով Ադրբեջանի նախագահի հետ բանակցություններ վարել։ Այս մասին հայտարարել է ՀՀ վարչապետ Նիկոլ Փաշինյանը Արցախի նախագահ Բակո Սահակյանի հետ հանդիպման ժամանակ։
NEWS.am–ի թղթակիցը հայտնում է, որ Փաշինյանը ընդգծել է, որ ԵԱՀԿ ՄԽ շրջանակներում բանակցությունների ձեւաչափը չի կարող ամբողջական համարվել, քանի դեռ դրան չի մասնակցում Արցախը։ Սա պատճառներից մեկն է, թե ինչու բանակցությունները սպասվող արդյունքներ չեն տալիս։ Փաշինյանը ընդգծել է Արցախի միջազգային ճանաչման հարցում Սփյուռքի ներգրավման անհրաժեշտությունը. «Մենք հանձնառու ենք հարցի խաղաղ կարգավորմանը եւ դատապարտում ենք ագրեսիայի ցանկացած դրսեւորում։ Կասկած չկա, որ կառավարությունը բոլոր ջանքերը կներդնի հակամարտության կարգավորման համար՝ ելնելով Արցախի ժողովրդի շահերից»,–շեշտել է Փաշինյանը։
Իր հերթին Բակո Սահակյանը նշել է, որ Արցախի ժողովուրդը շատ դժվարություններ է հաղթահարել Հայաստանի ու Սփյուռքի աջակցության շնորհիվ։