Ռուսաստանի եւ Հայաստանի հարաբերությունները մշտապես առաջընթաց զարգացում են ունեցել եւ չեն արգելակվի, կշարունակեն նույն տեմպերով զարգանալ, ինչպես մինչ այս են զարգացել: Այս մասին NEWS.am-ի թղթակցի հետ զրույցում ասաց Հայաստանում ՌԴ արտակարգ եւ լիազոր դեսպան Իվան Վոլինկինը:
Նրա խոսքով՝ Մոսկվայի եւ Երեւանի երկկողմ հարաբերությունները կզարգանան բոլոր ուղղություններով:
«Մենք լայն տնտեսական համագործակցություն ունենք, գիտատեխնիկական համագործակցություն հումանիտար ոլորտում, ռազմական ոլորտում, ռազմատեխնիկական ոլորտում: Կարծում եմ, որ Սոչիում առաջիկա հանդիպումը (Փաշինյանի եւ Պուտինի – խմբ.) մեր հարաբերությունների զարգացմանը նոր խթան կհաղորդի»,- նշեց դեսպանը:
Հարցին՝ հետխորհրդային երկրներում եւ ԵՄ երկրների տարածքում ազգամիջյան փոխհարաբերությունների հետագա զարգացման սպառնալիք չի՞ տեսնում՝ հաշվի առնելով, որ որոշ երկրներում, ներառյալ Ռուսաստանում, ակտիվացել են ծայրահեղ աջ ազգայնական եւ նեոնացիստական շարժումներն ու կազմակերպությունները, Վոլինկինը պատասխանեց, որ նման սպառնալիք կա, եւ այն էական է:
«Շատ երկրներում կան նման շարժումներ, իսկ ցանկացած արմատականություն՝ լինի աջ կամ ձախ, լավ չէ: Հասարակության շրջանում միշտ պետք է փոխզիջումներ գտնեն: Այն պետք է ընդհանուր լինի: Եթե հանրությունը միասնական չլինի, ապա սա, բնականաբար, կազդի ե՛ւ տնտեսության, ե՛ւ սոցիալական ոլորտի զարգացման վրա»,- ընդգծեց դեսպանը:
Վոլինկինը ցանկություն հայտնեց, որ հայ հանրությունը համախմբվի եւ միայն առաջ ընթանա՝ զարգացնելով իր տնտեսությունը, սոցիալական եւ հումանիտար ոլորտը: