Հայաստանում մայիսի 9-ին նշում են Հաղթանակի եւ խաղաղության տոնը: Այդ առիթով շնորհավորական ուղերձներ են հղել Հայաստանի եւ Արցախի նախագահները, վարչապետ Նիկոլ Փաշինյանը, ինչպես նաեւ Սերժ Սարգսյանը:
Իսկ Նիկոլ Փաշինյանն այսօր Արցախում էր: Նա Բակո Սահակյանի հետ Ստեփանակերտի Եղբայրական հուշահամալիրում մասնակցել է Շուշիի ազատագրման 26-ամյակի արարողությանը, ներկա գտնվել հայկական երկու հանրապետությունների ռազմական համագործակցության շրջանակում Պաշտպանության բանակի շտաբում անցկացված ծառայողական խորհրդակցությանը: Նիկոլ Փաշինյանը նաեւ այցելել է Շուշի, իսկ ավելի ուշ Ստեփանակերտում հանդիպել լրատվամիջոցների ներկայացուցիչներին: Ի դեպ՝ նա իր հետ Արցախ բազմաթիվ արտասահմանցի լրագրողների էր տարել:
Հարցերի մի մասը, ինչպես պետք էր ակնկալել, վերաբերել է Արցախի հիմնախնդրին: Հայաստանի նորընտիր վարչապետը պատրաստ է շարունակել ԵԱՀԿ Մինսկի խմբի ձեւաչափով հակամարտության կարգավորման շուրջ բանակցությունները, բայց դրանց հաջողության համար մեկ պայման է կարեւորում: Լրագրողների հարցին ի պատասխան՝ Փաշինյանն անդրադարձել է նաեւ Ադրբեջանի ռազմատենչ հռետորաբանությանն ու Արցախի միջազգային ճանաչմանը:
Արցախ այցի արդյունքները Նիկոլ Փաշինյանը շտապել է ամփոփել ֆեյսբուքյան տեսանյութով: Սա, ի դեպ, կարծես ավանդույթ է դառնում. երեկ երեկոյան էլ վարչապետը սոցցանցում ներկայացրել էր Բաղրամյան 26-ում իր աշխատավայրը:
Մայիսի 8-ին վարչապետի պաշտոնում Նիկոլ Փաշինյանի ընտրությունից հետո պաշտոնանկությունների շարքը շարունակվում է: Երեկ հրաժարական ներկայացրեցին պաշտպանության փոխնախարարներ Արտակ Զաքարյանն ու Արտակ Դավթյանը, իսկ ավելի ուշ պաշտոնից հրաժարվելու մասին հայտարարեց նախարարի պաշտոնակատար Վիգեն Սարգսյանը:
Այսօր կայացած մամուլի ասուլիսում էլ Սարգսյանը հայտնել է, որ կշարունակի կատարել պարտականությունները, մինչեւ նոր պաշտպանության նախարարի նշանակումը: Նա, միաժամանակ, բացառել է նոր կառավարությունում իր աշխատելու հնարավորությունը: Ինչ վերաբերում է նախարարի հնարավոր թեկնածուին. Վիգեն Սարգսյանն այդ հարցում համամիտ է «Ելք»-ի հետ եւ այդ պաշտոնում տեսնում է Դավիթ Տոնոյանին:
Նախագահ Արմեն Սարգսյանի գլխավորությամբ այսօր բազմաթիվ պաշտոնյաներ Հաղթանակի զբոսայգում էին: Նրանք ծաղկեպսակ են դրել Անհայտ զինվորի գերեզմանի Անմար կրակի առջեւ եւ հետեւել ոչ մեծ շքերթին: Քաղաքական հարցերն այստեղ էլ չեն շրջանցվել: Նախագահին լրագրողները հարցրել են, թե ինչպես է պատրաստվում աշխատել Նիկոլ Փաշինյանի կառավարության հետ, հաշվի առնելով այն հանգամանքը, որ իրեն պաշտոնում առաջադրել է Սերժ Սարգսյանն ու նրա գլխավորած կուսակցությունը: Արմեն Սարգսյանը դրանում խնդիր չի տեսնում:
Իսկ ՀԱԿ-ն արդեն պատրաստվում է արտահերթ խորհրդարանական ընտրությունների: Լեւոն Զուրաբյանն ասում է՝ դրանք ազատ եւ արդար կլինեն, եթե անցկացվեն բացառապես համամասնական ընտրակարգով:
ԱՄՆ-ն դուրս եկավ իրանական միջուկային համաձայնագրից: Դոնալդ Թրամփը հայտարարել է, որ Վաշինգտոնը միջուկային շանտաժի պատանդ չի դառնա, իսկ Իրանին աշխարհում «ահաբեկչության առաջատար հովանավոր» կոչել: Թրամփը նաեւ մտադիր է նոր պատժամիջոցներ սահմանել, ընդ որում՝ ոչ միայն Իրանի, այլեւ բոլոր այն երկրների դեմ, որոնք օգնում են Թեհրանին: ԱՄՆ Ֆինանսների նախարարությունն էլ արդեն հայտնել է, որ 180 օրվա ընթացքում վերականգնելու է տնտեսական պատժամիջոցները: Դրանք կվերաբերեն, մասնավորապես, Իրանի նավթային, էներգետիկայի եւ բանկային ոլորտներին:
Իրանում Վաշինգտոնի որոշմանը բուռն են արձագանքել: Իրանցի խորհրդարանականներն այրել են միջուկային համաձայնագիրն ու թղթի վրա տպագրված ԱՄՆ դրոշը՝ բղավելով «Մահ Ամերիկային»:
Նախագահ Հասան Ռոհանին իր հերթին Իրանի ատոմային էներգիայի կազմակերպությանը հանձնարարել է նախապատրաստվել արդյունաբերական մակարդակով ուրանի հարստացման վերսկսմանը: Բայց Թեհրանը դեռ մի քանի շավաթ կսպասի՝ միջուկային համաձայնագրի եվրոպական մասնակիցների, ինչպես նաեւ Ռուսաստանի եւ Չինաստանի հետ խորհրդակցելու համար: Եթե առանց ԱՄՆ-ի «երաշխավորվեն Իրանի ազգային շահերը, Թեհրանը կմնա գործարքում»:
«Սասնա ծռեր» զինված խմբի անդամ Արայիկ Խանդոյանն ու Աշոտ Պետրոսյանը մայիսի 8-ից հացադուլ են հայտարարել: Խանդոյանի պաշտպան Արա Ղարագյոզյանի տեղեկացմամբ՝ նրանք պահանջում են համաներում հայտարարել եւ անհապաղ ազատ արձակել բոլոր քաղբանտարկյալներին: Նշենք, որ արդեն 14 օր է՝ նման պահանջով հացադուլի մեջ է նաեւ Գարեգին Չուքասզյանը: Նա ձերբակալվել է ապրիլի 24-ին եւ մեղադրվում է «Սասնա ծռերին» աջակցելու մեջ:
Հայաստանի մասնակցի ելույթը, փաստորեն, չտպավորեց «Եվրատեսիլ» երգի մրցույթի ժյուրիին եւ հանդիսատեսին: Երեկ երեկոյան կայացավ մրցույթի առաջին կիսաեզրափակիչը: 16 համարի ներքո «Քամի» երգով ներկայացավ Սեւակ Խանաղյանը: Նա չկարողացավ եզրափակիչ անցնել: Եզրափակիչում ելույթ ունենալու հնարավորություն ստացան Ավստրիայի, Էստոնիայի, Կիպրոսի, Լիտվայի, Իսրայելի, Չեխիայի, Բուլղարիայի, Ալբանիայի, Իռլանդիայի եւ Նիդեռլանդների ներկայացուցիչները: Հավելենք, որ մրցույթի երկրորդ կիսաեզրափակիչը տեղի կունենա մայիսի 10-ին, իսկ եզրափակիչ համերգը մայիսի 12-ին է:
Մայիսի 10-ին հանրապետության շրջանների զգալի մասում ժամանակ առ ժամանակ սպասվում է անձրեւ եւ ամպրոպ, ամպրոպի ժամանակ՝ քամու ուժգնացում: Օդի ջերմաստիճանն էապես չի փոխվի: Երեւանում նույնպես վաղը տեղումներ կլինեն: Մայրաքաղաքում գիշերը կդիտվի +10+12, ցերեկը՝ +21+23 աստիճան տաքություն: