Ադրբեջանին տարածքների հանձնման հարցը պետք է ամբողջությամբ հանվի օրակարգից, իսկ Մադրիդյան սկզբունքները հայ դիվանագիտության պատմության ամենախայտառակ էջերից մեկն է: Նման կարծիք «Արդյո՞ք Արցախը կվերադառնա բանակցայի սեղանին. իրադարձությունների հնարավոր զարգացումը ղարաբաղյան հակամարտության կարգավորման գործընթացի շուրջ» թեմայով քննարկման ժամանակ հայտնեց ՀՀ արտակարգ եւ լիազոր դեսպան Արման Նավասարդյանը:
Խոսքը, ըստ նրա, որեւէ տարածքի հանձնման կամ անկախության մասին չէ, խոսքը Հայաստանի եւ հայ ժողովրդի նկատմամբ ցեղասպան քաղաքականության մասին է, որի դեմ պետք է պայքարել: «Հայաստանը պետք է կարողանա հասնել նրան, որպեսզի այդ մասին հայտնի դառնա ամբողջ աշխարհին: Գուցե հենց այդ ժամանակ փոխվեն տրամադրություններն եւ մոտեցումներն այս հարցում»,- ասաց փորձագետը: Միեւնույն ժամանակ, նա կասկածներ հայտնեց առ այն, որ Բաքուն պատրաստ է զիջումների գնալ՝ հավելելով, որ դրա համար պետք է ազդեցության ոչ ստանդարտ մեթոդներ կիրառվեն:
Հիշեցնենք, որ Լեռնային Ղարաբաղ կատարած այցի ընթացքում Հայաստանի նորընտիր վարչապետ Նիկոլ Փաշինյանը հայտարարել էր, որ Հայաստանը կաջակցի ԼՂՀ անկախության ճանաչմանը միջազգային հանրության կողմից: Նա ընդգծել էր, որ բանակցային գործընթացը՝ առանց դրանում ղարաբաղյան կողմի մասնակցության, անարդյունավետ կլինի: