Իրենց հայտարարություններով, որքան էլ դրանք անհեթեթ լինեն, կողմերը ցուցադրում են Լեռնային Ղարաբաղի հակամարտության կարգավորման վերաբերյալ սեփական կարծիքը եւ հակամարտության մեթոդաբանության պատկերացումը: Մայիսի 11-ին ընթացող «Արցախն արդյոք կվերադառնա՞ բանակցությունների սեղան: Իրադարձությունների հնարավոր զարգացումներ ղարաբաղյան հակամարտության կարգավորման գործընթացի շուրջ» թեմայով քննարկման ժամանակ այսպիսի կարծիք հայտնեց ԱԺ նախկին պատգամավոր Հովհաննես Իգիթյանը:
Նրա խոսքով՝ Ադրբեջանի նախագահ Իլհամ Ալիեւը հոր՝ Հեյդար Ալիեւի ծննդյան 95-ամյակը նշելիս հանդես կգա Լեռնային Ղարաբաղի վերաբերյալ հերթական հայտարարությամբ: «Եվ նա որքան շատ հիմար ու անհեթեթ հայտարարություններ կատարի, այնքան դա մեզ համար օգտակար կլինի»,- նշեց Իգիթյանը:
Ըստ նրա՝ Հայաստանը եւս պետք է հանդես գա որոշակի դիրքորոշմամբ եւ հայտարարություններով՝ չվախենալով եւ իրեն չսահմանափակելով որեւիցե շրջանակում, քանի որ դա նույնպես քաղաքականության եւ ընդհանրապես բանակցային գործընթացի մաս է:
Հիշեցնենք, որ Լեռնային Ղարաբաղ իր այցի ժամանակ նորընտիր վարչապետ Նիկոլ Փաշինյանը հայտարարել էր, որ Հայաստանը կնպաստի միջազգային մակարդակում Լեռնային Ղարաբաղի Հանրապետության անկախության ճանաչմանը: Նա շեշտել էր, որ առանց ղարաբաղյան կողմի մասնակցության բանակցային գործընթացը ոչ արդյունավետ կլինի:
