Իրանի փորձագետների խորհրդի անդամ եւ Թեհրանում ուրբաթօրյա աղոթքի հովիվ Ահմադ Հաթամին ասել է, որ եթե Իսրայելն «անխոհեմ» գործի, ապա Թել-Ավիվն ու Հայֆան կոչնչացվեն, փոխանցում է «ՌԻԱ Նովոստի»-ն՝ վկայակոչելով IRIB հեռուստաալիքը:
«Մենք չենք զբաղվում միջուկային ռումբով, հակառակը՝ մեր քաղաքականությունը զսպան քաղաքականությունն է, այս ուղղությամբ Իրանի հրթիռային ուժն ամեն օր հզորանում է, որպեսզի Իսրայելն այդ ուժից չկարողանա քնել: Իսկ եթե այն խելամտորեն չգործի, ապա մենք Թել-Ավիվն ու Հայֆան գետնին կհավասարեցնենք»,- ասել է Հաթամին:
Հիշեցնենք, որ Իսրայելը նախօրեին հարձակում էր իրականացրել Սիրիայի տարածքում գտնվող տասնյակ իրանական ռազմական օբյեկտների վրա: Իսրայելի պաշտպանության բանակում հայտարարել էին, որ դա պատասխանն էր Սիրիայում գտնվող իրանական դիրքերից արձակված կրակին, եւ հավելել է, որ նախապես տեղեկացրել է ռուս զինվորականներին հարձակման մասին: Ընդ որում, Իրանում պնդում են, որ կապ չունեն հարձակման հետ, որն անվանում են Սիրիայի պատասխանն իսրայելական ագրեսիային: