Մայիսի 14-ին Սոչիում Ռուսաստանի նախագահ Վլադիմիր Պուտինը եւ Հայաստանի վարչապետ Նիկոլ Փաշինյանը Եվրասիական տնտեսական բարձրագույն խորհրդի նիստի «շրջանակում» կքննարկեն տարածաշրջանային անվտանգության հրատապ հարցերը: Այս մասին լրագրողներին ասել է ՌԴ նախագահի օգնականի պաշտոնակատար Յուրի Ուշակովը, փոխանցում է ՏԱՍՍ-ը:
«Սպասվում է, որ Սոչիում առաջիկա բանակցությունների ժամանակ կքննարկվեն երկկողմ օրակարգի առանցքային հարցեր, ինչպես նաեւ տարածաշրջանային անվտանգության մի քանի հրատապ հարցեր»,- ասել է նա:
Ուշակովի խոսքով՝ սա 2 երկրների առաջնորդների առաջին հանդիպումն է լինելու Հայաստանում քաղաքական համակարգի փոփոխությունից հետո:
Ուշակովը նշել է, որ «միջազգային եւ տարածաշրջանային օրակարգի հարցերում Ռուսաստանի եւ Հայաստանի դիրքորոշումները մոտ են կամ համընկնում են»: «Երկու երկրների ԱԳ նախարարությունների գծով ինտենսիվ շփումները նպաստում են արտաքին քաղաքականության ոլորտում համակարգմանը, այդ թվում՝ ՄԱԿ-ի, Եվրասիական տնտեսական միության, ԱՊՀ-ի, ՀԱՊԿ-ի, ԵԱՀԿ-ի եւ այլ բազմակողմ կազմակերպությունների շրջանակում»,- հավելել է նա:
Կրեմլի ներկայացուցիչը նաեւ հիշեցրել է, որ Ռուսաստանը, ԵԱՀԿ Մինսկի խմբի մյուս երկու համանախագահների հետ (ԱՄՆ եւ Ֆրանսիա), «ակտիվ միջնորդական դեր է խաղում Լեռնային Ղարաբաղի հակամարտության խաղաղ կարգավորման գործընթացում»: