Հարավային Կորեայից մի խումբ ակտիվիստներ դեպի Հյուսիսային Կորեայի տարածք քարոզչական թերթիկներով փուչիկներ են բաց թողել օդ՝ չնայած նման գործողություններից զերծ մնալու՝ կառավարության կոչին: Այս մասին գրում է ՌԻԱ Նովոստին՝ վկայակոչելով Ռյոնհափ գործակալությունը:
«Հյուսիսային Կորեայի ազատության համար շարժման» վեց անդամներ սահմանամերձ Փհաջու քաղաքից դեպի Հյուսիսային Կորեայի տարածք Կիմ Չեն Ընի հասցեին քննադատությամբ 150 հազար քարոզչական թերթիկ են ուղարկել:
Նրանք փուչիկներին «Չխաբվենք երկխոսության եւ խաղաղության մասին Կիմ Չեն Ընի կեղծ առաջարկներով» գրությամբ պաստառներ են փակցրել:
Մայիսի 5-ին շարժման անդամները կրկին փորձել էին Հյուսիսային Կորեայի տարածք քարոզչական թերթիկներով փուչիկներ ուղարկել, սակայն Հարավային Կորեայի ոստիկանությունը կանխել է:
Հարավային եւ Հյուսիսային Կորեաների առաջնորդներն ապրիլի 27-ին Փհանմունջոմ սահմանային կետում կայացած գագաթնաժողովի ընթացքում հռչակագիր էին ստորագրել եւ համաձայնություն ձեռք բերել խաղաղության վերականգնման եւ թշնամական գործողությունները դադարեցնելու հարցով: Մայիսի 1-ին էլ մեկնարկել է ապառազմականացված գոտում բարձրախոսների ապամոնտաժումը, որոնք օգտագործվում էին Հյուսիսային Կորեայի դեմ «հոգեբանական պատերազմ» մղելու համար:
