Վարչապետի պաշտոնում Նիկոլ Փաշինյանի այցը Լեռնային Ղարաբաղ չափազանց կարեւոր նշանակություն ուներ: Այս մասին մայիսի 12-ին լրագրողների հետ հանդիպման ժամանակ ասաց Հայաստանի Հանրապետությունում ԼՂՀ մշտական ներկայացուցչության խորհրդական, «Ազգային անվտանգություն» կուսակցության ղեկավար Գառնիկ Իսագուլյանը:
Նրա խոսքով՝ Հայաստանի նախորդ նախագահների ոչ մի այց Լեռնային Ղարաբաղ այդպիսի նշանակություն չի ունեցել, եւ որակի ու տեսողական իմաստով դրանք անչափ տարբերվել են Նիկոլ Փաշինյանի վերջերս կատարած այցից: «Դուք բոլորդ տեսաք, որ ԼՂՀ նախագահ Բակո Սահակյանը ելույթ էր ունենում ԼՂՀ դրոշի ներքո, իսկ Հայաստանի վարչապետ Նիկոլ Փաշինյանը՝ հայկական: Այսպիսով, բանակցությունները ստացան միջպետական տեսք»,- պարզաբանեց Իսագուլյանը:
Ինչպես նշեց Իսագուլյանը, բանակցությունները շատ դրական ու կարեւոր էին: Նա հավաստիացրեց, որ ղարաբաղյան հանրությունը նույն կերպ դրական վերաբերվեց այս այցին եւ երկու առաջնորդների հանդիպմանը:
Ղարաբաղյան հակամարտության վերաբերյալ Փաշինյանի հայտարարությունները նույնպես շատ դրական էին, ասաց «Ազգային անվտանգություն» կուսակցության ղեկավարը:
Խոսելով Ղարաբաղին բանակցային հործընթացին ներգրավելու վերաբերյալ Փաշինյանի հայտարարության մասին՝ Իսագուլյանը հայտարարեց, որ այն ամբողջությամբ համապատասխանում է իրականությանը, եւ բանակցային գործընթացին ԼՂՀ-ի մասնակցությունը ճիշտ որոշում կլիներ ու միանգամայն արդարացի:
«Ի վերջո, առանց ԼՂՀ-ի մասնակցության՝ ղարաբաղյան հակամարտության կարգավորման ոչ մի լուծում չի կարող լինել»,- եզրափակեց Իսագուլյանը՝ հավելելով, որ Հայաստանը դեռեւս ստիպված է բանակցային գործընթացում ներկայացնել ղարաբաղյան կողմին, որպեսզի Ադրբեջանը բանակցային գործընթացից չխուսափի:
Միաժամանակ, ինչպես նշեց Իսագուլյանը, նորընտիր վարչապետ Նիկոլ Փաշինյանը եւ Հայաստանի նախորդ նախագահները արդեն հայտարարել են, որ Բաքվի կողմից ԼՂՀ-ին ուղղված որեւէ սպառնալիքի դեպքում Հայաստանը պատրաստ կլինի անմիջապես ճանաչել Լեռնային Ղարաբաղի անկախությունը:
