News
Լրահոս
News
Երկուշաբթի
Օգոստոս 20
Տեսնել լրահոսը


Այսօր՝ մայիսի 12-ին ամբողջությամբ ձեւավորվեց Նիկոլ Փաշինյանի գլխավորած Հայաստանի նոր կառավարությունը, ՀՀ նախագահի հրամանագրերով նշանակվեցին բոլոր նախարարները:

Ապրիլի 23-ին ՀՀ վարչապետի պաշտոնից Սերժ Սարգսյանի հրաժարականից հետո համաժողովրդական ալիքի ֆոնին իշխանության եկած կառավարությունում, որը բաղկացած է վարչապետից, առաջին փոխվարչապետից, 2 փոխվարչապետից եւ 17 նախարարներից, ընդամենը երկուսն են կին: Նրանցից մեկը Ազգային ժողովի «Ելք» խմբակցության պատգամավոր, «Լուսավոր Հայաստան» կուսակցության փոխնախագահ Մանե Թանդիլյանն է. նա զբաղեցրել է աշխատանքի եւ սոցիալական հարցերի նախարարի պաշտոնը: Երկրորդը Լիլիթ Մակունցն է, նշանակվել է մշակույթի նախարար:

Առաջին փոխվարչապետի եւ մեկ փոխվարչապետի պաշտոնները զբաղեցրել են Փաշինյանի կուսակիցներ Արարատ Միրզոյանն ու Տիգրան Ավինյանը, երկրորդ փոխվարչապետի պաշտոնը զբաղեցրել է բանկիր Մհեր Գրիգորյանը:

Փաշինյանի կառավարությունում ՀՅԴ-ին բաժին է հասել 2 նախարարական պորտֆել. Արծվիկ Մինասյանը նշանակվել է ՀՀ տնտեսական զարգացման եւ ներդրումների նախարար, իսկ Շիրակի նախկին մարզպետ Արթուր Խաչատրյանն էլ՝ գյուղատնտեսության նախարար:

ԲՀԿ-ի քվոտայով 2010-ին աշխատանքի եւ սոցիալական հարցերի նախարար նշանակված Արթուր Գրիգորյանը հիմա էլ զբաղեցրել է Էներգետիկ ենթակառուցվածքների եւ տեղեկատվական տեխնոլոգիաների նախարարի պաշտոնը: Նախկին քննիչ Աշոտ Հակոբյանը դարձել է տրանսպորտի, կապի եւ ՏՏ նախարար։ ԲՀԿ-ական Լեւոն Վահրադյանը զբաղեցրել է սպորտի եւ երիտասարդության հարցերի նախարարի պաշտոնը: Իսկ ԲՀԿ քվոտայով 2012-ին սպորտի եւ երիտասարդության հարցերի նախարար Հրաչյա Ռոստամյանը նշանակվել է արտակարգ իրավիճակների նախարար:

Նիկոլ Փաշինյանի կառավարությունում ամենաերիտասարդ անդամը սփյուռքի նախարար Մխիթար Հայրապետյանն է՝ 27 տարեկան, ամենատարեցը՝ Զոհրաբ Մնացականյանը՝ 52 տարեկան: Կառավարության անդամների միջին տարիքը 40-ից քիչ ավելի է:

ԱՐԱՐԱՏ ՄԻԶՈՅԱՆ

Առաջին փոխվարչապետ Արարատ Միրզոյանը 39 տարեկան է, պատմական գիտությունների թեկնածու: Արարատ Միրզոյանը դասախոսել է Երեւանի պետհամալսարանում, «Քաղաքացիական պայմանագիր» կուսակցության անդամ է, ունի 2 երեխա:

ՏԻԳՐԱՆ ԱՎԻՆՅԱՆ

ՀՀ փոխվարչապետ Տիգրան Ավինյանը 29 տարեկան է, ավարտել է Լոնդոնի Քուին Մերի համալսարանը` ստանալով ֆինանսների մագիստրոսի կոչում։ 2014թ.-ից հիմնադրել եւ ղեկավարում է «Սայբեր Վիժըն» ընկերությունը, որը զբաղվում է ծրագրային ապահովմամբ։ 2016-ին ՀՀ ՊՆ-ի կողմից պարգեւատրվել է պատվոգրով՝ ապրիլին եւ մայիսին Հայրենիքի սահմանների պաշտպանությանն ակտիվ մասնակցելու, առաջնագծում մարտական խնդիրները բարեխղճորեն կատարելու համար։ «Քաղաքացիական պայմանագիր» կուսակցության անդամ է, ունի 2 դուստր:

ՄՀԵՐ ԳՐԻԳՈՐՅԱՆ

Փոխվարչապետ Մհեր Գրիգորյանը 46 տարեկան է, բանկիր: Աշխատել է Կենտրոնական բանկում, Հայներարտբանկում (հիմա՝ Ամերիա), HSBC բանկում, եղել է Ինեկոբանկի գործադիր տնօրենը, ՎՏԲ Հայաստան բանկի գլխավոր տնօրենի տեղակալը: Նա պարգեւատրվել է Անանիա Շիրակացու մեդալով։ Մհեր Գրիգորյանն ունի երկու երեխա:

ԶՈՀՐԱԲ ՄՆԱՑԱԿԱՆՅԱՆ

ԱԳ նախարար Զոհրաբ Մնացականյանը 52 տարեկան է, ավարտել է Մոսկվայի միջազգային հարաբերությունների պետական ինստիտուտը: Կրթություն է ստացել Մանչեսթերի Վիկտորիա համալսարանում: Շատ հարուստ դիվանագիտական կենսագրություն ունի: Աշխատել է ԱԳՆ-ում, Վատիկանում, Լոնդոնում, Ժնեւում, Ստրասբուրգում: Եղել է ԱԳ փոխնախարար, 2014-ից ՄԱԿ-ում Հայաստանի ներկայացուցիչն է:  Տիրապետում է հայերեն, ռուսերեն, անգլերեն, ֆրանսերեն լեզուներին։ Անկուսակցական է, ամուսնացած է, ունի երկու որդի։

ԴԱՎԻԹ ՏՈՆՈՅԱՆ

Պաշտպանության նախարար Դավիթ Տոնոյանը 51 տարեկան է: Նա ավարտել է Երեւանի պետհամալսարանի երկրաբանական ֆակուլտետը, նաեւ ՌԴ ռազմադիվանագիտական ակադեմիան։ 2004-2007 թվականներին Տոնոյանը եղել է ՆԱՏՕ-ում ՀՀ ԶՈՒ ներկայացուցիչ։ 2010-ից 6 տարի զբաղեցրել է պաշտպանության փոխնախարարի պաշտոնը, ապա նշանակվել ԱԻ նախարար: Դավիթ Տոնոյանը ՊՆ-ում պարգեւատրվել է մի շարք մեդալներով, ունի երկու դուստր եւ մեկ որդի:

ԱՐՏԱԿ ԶԵՅՆԱԼՅԱՆ

Արդարադատության նախարար Արտակ Զեյնալյանը 49 տարեկան է: 1990-1997 թվականներին կամավոր մասնակցել է Հայաստանի եւ Արցախի սահմանների պաշտպանությանը՝ Նիկոլ-Դուման երկրապահ կամավորական ջոկատի կազմում, 1992 թվականին վիրավորվել է եւ կորցրել ոտքը: Եղել է առողջապահության փոխնախարար: 2010-ին դասավանդել է ՀՀ Փաստաբանների դպրոցում եւ ՀՀ Փաստաբանների պալատում: Զբաղվել է իրավապաշտպան գործունեությամբ: Ամուսնացած է, ունի չորս զավակ եւ մեկ թոռ:

ԱՐԱՅԻԿ ՀԱՐՈՒԹՅՈՒՆՅԱՆ

Կրթության եւ գիտության նախարար Արայիկ Հարությունյանը 39 տարեկան է: Մասնագիտությամբ արեւելագետ է, պատմական գիտությունների թեկնածու: Նա 2007-ից դասախոսում է ԵՊՀ-ում, 6 գիտական հոդվածի հեղինակ է: Արայիկ Հարությունյանը համախոհների հետ հիմնադրել է «Մենք դեմ ենք օտարալեզու դպրոցներին» քաղաքացիական նախաձեռնությունը, «Բանակն իրականում» խմբի անդամ է։ Արայիկ Հարությունյանը Երեւանի ավագանու «Ելք» խմբակցության անդամ է, «Քաղաքացիական պայմանագիր» կուսակցության անդամ:

ԱՏՈՄ ՋԱՆՋՈՒՂԱԶՅԱՆ

Ֆինանսների նախարար Ատոմ Ջանջուղազյանը 47 տարեկան է: Տեխնիկական գիտությունների թեկնածու է, մեկ մենագրության, մի շարք հոդվածների եւ զեկույցների հեղինակ։ 1995 թվականից աշխատում է ֆինանսների նախարարությունում: 1999-ից ՀՀ ֆինանսների նախարարի տեղակալ-գլխավոր գանձապետն է: Ատոմ Ջանջուղազյանը դասավանդում է մի շարք բուհերում: Անկուսակցական է։ Ամուսնացած է, ունի մեկ դուստր եւ երկու որդի։ Տիրապետում է ռուսերեն եւ անգլերեն լեզուներին։

ՍՈՒՐԵՆ ՊԱՊԻԿՅԱՆ

Տարածքային կառավարման եւ զարգացման նախարար Սուրեն Պապիկյանը 32 տարեկան է, պատմաբան: 2012-2016թթ. սովորել է Սանկտ Պետերբուրգի պետական համալսարանի ասպիրանտուրայում: «Քաղաքացիական պայմանագիր» կուսակցության վարչության փոխնախագահն է:

ՄԽԻԹԱՐ ՀԱՅՐԱՊԵՏՅԱՆ

Սփյուռքի նախարար Մխիթար Հայրապետյանը 27 տարեկան է: Արեւելագետ է, գիտական հոդվածների հեղինակ: Մխիթար Հայրապետյանը 2012-ին թուրքագետ Գեւորգ Պետրոսյանի հետ հիմնել է AllTurkey.am թուրքագիտական պորտալը: Աշխատել է մի շարք լրատվական գործակալություններում՝ որպես վերլուծաբան:

ՄԱՆԵ ԹԱՆԴԻԼՅԱՆ

Աշխատանքի եւ սոցիալական հարցերի նախարար Մանե Թանդիլյանը 40 տարեկան է, ավարտել է Հայկական պետական մանկավարժական համալսարանի պատմության ֆակուլտետը, ինչպես նաեւ Հայաստանի ամերիկյան համալսարանիի բիզնեսի կառավարման բաժինը: 2009 թվականից աշխատել է «Սինոփսիս Արմենիա» ՓԲԸ-ում՝ որպես ֆինանսական տնօրենի տեղակալ, գլխավոր հաշվապահ։ 2017 թվականին «Ելք» դաշինքի կողմից ընտրվել է ԱԺ պատգամավոր: «Լուսավոր հայաստան» կուսակցության փոխնախագահն է, ունի երկու երեխա:

ՀՐԱՉՅԱ ՌՈՍՏՈՄՅԱՆ

Արտակարգ իրավիճակների նախարար Հրաչյա Ռոստոմյանը 37 տարեկան է: Մասնագիտությամբ ատամնաբույժ-թերապեւտ է: Դասախոսել է Երեւանի պետական բժշկական համալսարանում։ 2012-ին նշանակվել է ՀՀ սպորտի եւ երիտասարդության հարցերի նախարար։ Այդ պաշտոնը զբաղեցրել է նաեւ 2016-ին: Երկար տարիներ խաղացել է բասկետբոլի Հայաստանի հավաքականի կազմում: ՀՀ սպորտի վարպետ է, Միջազգային կարգի մրցավար։ Ռոստոմյանն անկուսակցական է:

ԱՐԹՈՒՐ ԳՐԻԳՈՐՅԱՆ

Էներգետիկ ենթակառուցվածքների եւ բնական պաշարների նախարար Արթուր Գրիգորյանը 49 տարեկան է: Աշխատել է արդարադատության նախարարությունում, Վերահսկիչ պալատում: 2010-ին նշանակվել է ՀՀ աշխատանքի եւ սոցիալական հարցերի նախարար՝ ԲՀԿ-ի քվոտայով: Արդարադատության փոխգնդապետ է: Ամուսնացած է, ունի երկու զավակ։

ԱՐԹՈՒՐ ԽԱՉԱՏՐՅԱՆ

Գյուղատնտեսության նախարար Արթուր Խաչատրյանը 46 տարեկան է: Մասնագիտությամբ ֆիզիկոս է: Ավարտել է ԵՊՀ-ն, ապա Հայաստանի ամերիկյան համալսարանը: Արթուր Խաչատրյանը Ֆիզիկամաթեմատիկական գիտությունների թեկնածու է: 2016-2017թթ. աշխատել է ՀՀ տարածքային կառավարման եւ զարգացման նախարարությունում՝ որպես նախարարի տեղակալ, ապա նշանակվել է Շիրակի մարզպետ: Տիրապետում է հայերեն, ռուսերեն եւ անգլերեն լեզուներին: 1991թ.-ից ՀՅԴ անդամ է: Ամուսնացած է, ունի 3 երեխա:

ԱՐՍԵՆ ԹՈՐՈՍՅԱՆ

Առողջապահության նախարար Արսեն Թորոսյանը 36 տարեկան է, ավարտել է Երեւանի Մխիթար Հերացու անվան պետական բժշկական համալսարանը: 2010-2011թթ. ՀՀ ԱՆ տուբերկուլոզի դեմ պայքարի ազգային կենտրոնի Մոնիթորինգի եւ գնահատման բաժնի վարիչն է եղել, տնօրենի ժամանակավոր պաշտոնակատարը: Եղել է ՄԻԲՍ բժշկա-ախտորոշիչ կենտրոնի տնօրենը: Հեղինակ է հայաստանյան եւ միջազգային գիտական ամսագրերում տպագրված մի շարք հոդվածների: Անկուսակցական է: Ամուսնացած է, ունի երկու զավակ։

ԼԻԼԻԹ ՄԱԿՈՒՆՑ

Մշակույթի նախարար Լիլիթ Մակունցը 35 տարեկան է, բանասիրական գիտությունների թեկնածու: Անցել է դիպլոմավորված դասընթաց Ամերիկայի Թաֆթս համալսարանի Ֆլետչերի ամառային դպրոցում: 2005թ.-ից մինչ օրս դասավանդում է Հայ-ռուսական համալսարանում: 2016 թթ.-ից պայմանագրային հիմունքով աշխատում է Ամերիկյան խաղաղության կորպուսում: Ամուսնացած չէ:

ԱՐԾՎԻԿ ՄԻՆԱՍՅԱՆ

Տնտեսական զարգացման եւ ներդրումների նախարար Արծվիկ Մինասյանը 46 տարեկան է, մասնագիտությամբ տնտեսագետ եւ իրավաբան: ԵՊՀ-ից հետո կարճաժամկետ ծրագրերով ուսումը շարունակել է Մոսկվայում, Վաշինգտոնում եւ Նյու Յորքում: 2012 եւ 2017 թվականներին երկու անգամ ՀՅԴ կողմից ընտրվել է ԱԺ պատգամավոր: 2005-2007 թթ. եղել է ՀՀ աշխատանքի եւ սոցիալական հարցերի փոխնախարար: Եղել է Էկոնոմիկայի նախարար եւ բնապահպանության նախարար: Արծվիկ Մինասյանը ՀՅԴ անդամ է:

ԷՐԻԿ ԳՐԻԳՈՐՅԱՆ

Բնապահպանության նախարար Էրիկ Գրիգորյանը 39 տարեկան է: Սովորել է ԵՊՀ-ում, Հունաստանում, Գերմանիայում, մասնագիտությամբ տնտեսագետ է: 2002 թվականից աշխատում է բնապահպանության նախարարությունում, որտեղ զբաղեցրել է տարբեր պաշտոններ: Աշխատել է Հայաստանի Ամերիկյան համալսարանում, ՄԱԿ-ի ու ԵԱՀԿ-ի ծրագրերում: 2017-ի փետրվարից եղել է վարչապետի օգնական: Գիտական հոդվածների հեղինակ է: Անկուսակցական է, ամուսնացած է, ունի երկու որդի:

ԼԵՎՈՆ ՎԱՀՐԱԴՅԱՆ

Սպորտի եւ երիտասարդության հարցերի նախարար Լեւոն Վահրադյանը 34 տարեկան է, սովորել է Ֆիզիկական կուլտուրայի պետական ինստիտուտում, որտեղ էլ 2006-2010թթ. դասախոսել է: Ավարտել է նաեւ Պետական կառավարման ակադեմիան: Աշխատել է սպորտի եւ երիտասարդության հարցերի նախարարությունում (նախարարի օգնական, ապա՝ խորհրդական), ՀԱՕԿ-ում: Նա նախարարության մասսայական սպորտի եւ ֆիզիկական դաստիարակության քաղաքականության վարչության պետն էր: Ամուսնացած է, ունի մեկ դուստր:

ԱՇՈՏ ՀԱԿՈԲՅԱՆ

Տրանսպորտի, կապի եւ տեղեկատվական տեխնոլոգիաների նախարար Աշոտ Հակոբյանը 50 տարեկան է։ Ավարտել է Երեւանի պետական համալսարանի իրավագիտության ֆակուլտետը։ Աշխատել է Ներքին գործերի եւ ազգային անվտանգության նախարարությունում ոստիկանության քննչական գլխավոր վարչությունում։ Եղել է քննչական կոմիտեի Երեւան քաղաքի վարչության Ավան եւ Նոր Նորք վարչական շրջանների քննչական բաժնի պետ, Ընդհանուր բնույթի հանցագործությունների վարչության պետ։ Արդարադատության գնդապետ է։ Վերջին տարիներին զբաղվել է մասնավոր բիզնեսով։ Ամուսնացած է, ունի 2 երեխա:

ՎԱԼԵՐԻ ՕՍԻՊՅԱՆ

ՀՀ ոստիկանապետ Վալերի Օսիպյանը 48 տարեկան է: Նա տարբեր տարիների ոստիկանությունում զբաղեցրել է պաշտոններ, այդ թվում՝ եղել է գնդի վաշտի հրամանատար, գնդի հրամանատարի տեղակալ, գնդի հրամանատար, Երեւան քաղաքի վարչության հասարակական անվտանգության բաժնի պետ, Երեւան քաղաքի վարչության պետի տեղակալ: Օսիպյանն աչքի է ընկել որպես բողոքի ակցիաների ժամանակ ոստիկանական ստորաբաժանումները ղեկավարող անձ: 2016-ին ՊՊԾ գնդի գրավման ժամանակ պատանդառվել է «Սասնա ծռերի» կողմից: Ամուսնացած է, երկու 2 զավակ:

ԱՐԹՈՒՐ ՎԱՆԵՑՅԱՆ

ԱԱԾ տնօրեն Արթուր Վանեցյանը 39 տարեկան է, Սանկտ Պետերբուրգի արտաքին տնտեսական կապերի եւ իրավունքի համալսարանում, ՌԴ անվտանգության ծառայության ակադեմիայում:  ԱԱԾ համակարգում է 2000 թվականից, որտեղ զբաղեցրել է տարբեր պաշտոններ: 2016-2018 թթ. զբաղեցրել է ԱԱԾ Երեւանի քաղաքային վարչության պետի տեղակալի պաշտոնը: Արթուր Վանեցյանը գնդապետ է: Ամուսնացած է, ունի երկու զավակ:

Հ.Գ.

ՀՀ վարչապետ Նիկոլ Փաշինյանը 20-օրյա ժամկետում Ազգային ժողովին կներկայացնի կառավարության ծրագիրը։

!
Այս նյութը հասանելի է նաև   Русский
Տպել
Կարդացեք նաև
Ամբողջը
Հանրահավաքին վարչապետի մի քանի հայտարարություններ մտահոգություն են առաջացնում. փաստաբան
Նրա կարծիքով՝ պետք չէ նման սցենարով գնալ, գործադիրը չպետք է ստիպի օրենսդիր իշխանությանը…
Չարաչար սխալվում են նրանք, որոնց թվում է, թե նոստալգիայով կարող են կոռուպցիա քարոզել. Արման Եղոյան
Սա պետական կառավարման համակարգ է...
Փաշինյանի կառավարման 100 օրերը եղել են զգացմունքային, մի փոքր ցուցադրական. Րաֆֆի Հովհաննիսյան
Շատ լավ է, որ տեղերը փոխվում են եւ ամեն մեկը կարող է պարկեշտանալ…
«Ժառանգություն»–ը քաղաքապետի պաշտոնում 3 հոգու թեկնածություն է քննարկում. Րաֆֆի Հովհաննիսյան
«Ժառանգություն» կուսակցությունն ամեն ինչ անելու է, որ տակավին անկատար մեր ազգային հեղափոխությունը ամբողջանա...
Վարչապետի աշխատակազմի ղեկավարի շրջաբերականը սահմանափակելու է խոսքի ազատությունը. Աշոտյան (ֆոտո)
Ո՞ր իրավական հիմքով են պատժվելու այս «կարգը» խախտող աշխատակիցները...
100 օրվա ընթացքում այս կառավարությունն արել է հնարավորը կոռուպցիայի դեմ պայքարում. Վահագն Խաչատրյան
Ամեն կառավարություն չէ, որ նման քաղաքական կամք կցուցաբերեր...
Partner news