Վերջին ժամանակներս գյուղացիական տնտեսություններում անհիմն լուր էր տարածվել վերամշակողների կողմից կաթի գնման գնի կտրուկ նվազեցման վերաբերյալ, ինչը առաջացրել էր գյուղացիների վրդովմունքը։ Այս մասին հայտարարություն է տարածել Կաթ արտադրողների միությունը:
Հայտարարությունում նաեւ ասվում է.
«Մայիսի 11-ին խնդրի լուծման նպատակով վերամշակողների և գյուղտնտեսությունների ներկայացուցիչները հավաքվել էին գյուղնախարարի մոտ։ Հաշվի առնելով խնդրի հրատապությունը, մայիսի 13-ին, հաշվի չառնելով հանգստյան օրվա հանգամանքը, վերոնշյալ կազմին ընդունեց ՀՀ Կառավարության փոխվարչապետը։
Ելնելով ներկա քաղաքական իրավիճակից` համերաշխության մթնոլորտում որոշվեց փոխզիջման գնալով հարցին տալ տրամաբանական լուծում։
Թեև այս տարի, նախորդ տարվա նույն ժամանակահատվածի համեմատությամբ, կաթի գինը ավելի բարձր էր վճարվում, սակայն կաթնամթերք արտադրողների միության անդամների կողմից երաշխավորվում է, որ մոտ ժամանակներում կաթի գնի նվազեցում չի կատարվի։
Գիտակցում ենք, որ այս քայլով նպաստում ենք գյուղատնտեսության կարևոր ճյուղերից մեկի կայունության ապահովմանը»:
Հայտարարությունը ստորագրել են՝ Կաթ արտադրողների միությունը, «Դուստր Մարիաննա» ՍՊԸ-ն, «Աշտարակ կաթ» ընկերությունը, «Թամարա» ՍՊԸ-ն, «Արզնի կաթ»-ը:
Ավելի վաղ NEWS.am-ը հայտնել էր, որ Հայաստանի առաջին փոխվարչապետ Արարատ Միրզոյանը կաթի մթերման գնի օրակարգային խնդրին օպերատիվ լուծում տալու նպատակով հանդիպումների շարք է անցկացրել կաթ վաճառող ֆերմերային տնտեսությունների, կաթ մթերող եւ կաթնամթերք արտադրող ընկերությունների ներկայացուցիչների, համապատասխան նախարարությունների եւ գերատեսչությունների ղեկավարների հետ։
