«Մարդկային զարգացման միջազգային կենտրոնի» տնօրեն, նախագահի խորհրդական Թեւան Պողոսյանը խորհուրդ է տալիս նոր կառավարության գործունեությանը վստահությամբ վերաբերվել: Պողոսյանն իր կարծիքը հայտնեց մայիսի 14-ին լրագրողների հետ հանդիպման ժամանակ:
Նրա խոսքով՝ վերջին ամսվա ընթացքում Հայաստանի բնակիչները դարձան արտասովոր գործընթացների ականատեսը: Գործընթացին տարբեր անվանումներ են տրվում՝ հեղափոխություն, իշխանափոխություն, ազգային զարթոնք, նշեց Պողոսյանը: Նոր կառավարության վերաբերյալ նա նշեց, որ այն բնութագրելու առաջին բառը վստահությունն է: «Չէ՞ որ մենք վստահել ենք վարչապետին, եւ հույս ունենանք, որ նրանք թիմի պատկերացումները կիրականացնեն»,- կարծում է Պողոսյանը: Երկրորդ բնորոշումը նոր շունչն է: «Անչափ ուրախ եմ, որ երիտասարդներ են եկել, որոնք համակարգի հետ կապված չեն, բյուրոկրատական մեքենայի հետ «կապերով» ճնշված չեն: Այսօր գլխավոր խնդիրը այն բանի ընկալումն է, որ փոփոխությունները չպետք է վերաբերեն միայն կառավարությանը: Պետք է փոխվի յուրաքանչյուրը»,- նշեց Պողոսյանը: Եթե որեւէ մեկը չկարողանա դրված պարտականությունները կատարել, հայտնի է, թե ինչ է պետք անել: Թեւան Պողոսյանը չմանրամասնեց նոր նախարարների անձը՝ նորամուծությունների մասին ընդհանրապես խոսելով: «Սպասենք՝ տեսնենք եւ լավի հույս ունենանք»,- հայտարարեց Պողոսյանը՝ կոչ անելով գործել հայտնի «Դուխով» կարգախոսին համապատասխան:
Պողոսյանի խոսքով՝ հեռանկարում են ազնիվ եւ արդար ընտրությունները: Սակայն պետք է գիտակցել, որ դրա համար օրենսդրական լայն փոփոխություններ են պետք, ինստիտուտների փոփոխություններ, կաշառքի դեմ պայքար, արդար դատական համակարգ: «Եթե անգամ այս ամենը մեկ ամսում հաղթահարվի, ժամանակ է հարկավոր, որ հանրությունը սա ընկալի»,- կարծում է Պողոսյանը՝ հասարակական կազմակերպություններին կոչ անելով բնակչության շրջանում համապատասխան աշխատանք անցկացնել: Այսինքն՝ կառավարության գործողությունները պետք է հասարակությանը հայտնի եւ հասկանալի լինեն: Նախորդ իշխանությունների սխալը ժողովրդից կտրվածությունն էր, նշեց Թեւան Պողոսյանը:
«Նպատակը ընտրությունները ազնիվ եւ արդար պայմաններում անցկացնելն է: Կանխատեսել, թե դա երբ կլինի, անշնորհակալ գործ է»,- նշեց Պողոսյանը՝ շեշտելով, որ նպատակն ամենեւին Նիկոլ Փաշինյանի թիմի պարտադիր ընտրությունը չի, այլ թափանցիկ եւ վստահության արժանի ընտրությունների անցկացումը: «Խոսքն անձերի մասին չէ, այլ համակարգային արժեքների»,- պարզաբանեց Թեւան Պողոսյանը:
Պատասխանելով ընտրությունները հետաձգելու դեպքում Նիկոլ Փաշինյանի թիմի վարկանիշի անկման մասին հարցին՝ Թեւան Պողոսյանը հիշեցրեց, որ վարկանիշն ընկնում է, երբ վատ են աշխատում: Լավ կաշխատեն, եւ վարկանիշն անկում չի ունենա, նշեց Պողոսյանը: Խոհրդարանում ուժերի դասավորության վերաբերյալ Պողոսյանը կարծիք հայտնեց, որ կառուցողական մոտեցման դեպքում կարող է երկխոսությունը կայանալ: