Ազգային ժողովի արտահերթ ընտրությունների միակ տարբերակը սահմանադրական ճանապարհն է։ Այս մասին NEWS.am-ի հետ զրույցում ասել է ՀՀԿ խմբակցության քարտուղար Գագիկ Մելիքյանը։ Պատգամավորը հավաստիացրել է, որ ՀՀԿ մեծամասնությունը չի խոչընդոտելու կառավարության ծրագրի իրականացմանը ու որպես ընդդիմություն լինելու է կառուցողական։
«Չեմ հասկանում այդ հասկացությունը, որ ընդդիմությունը պետք է անպայման խոչընդոտի, դա անընդունելի է։ Ընդդիմությունը, ինչպես եւ իշխանությունը առաջնորդվելու է իր ժողովրդի եւ իր պետութան շահերով։ Այն օրենսդրական նախագծերը, որ կբխեն ժողովրդի շահերից Հանրապետականը պաշտպանելու է»։
Գագիկ Մելիքյանը կարծում է, որ խմբակցության որոշման հակառակ՝ առանձին քվեարկություններ չեն լինելու Նիկոլ Փաշինյանի կառավարության ներկայացրած օրենսդրական նախաձեռնությունների օգտին։ Գագիկ Մելիքյանը կարծում է, որ պայմանավորված ընտրությունների գնալը թեեւ սահմանադրական տարբերակ է, բայց հաճելի չէ. «Դա իր մեջ ունի սեպարատ բանակցությունների նշաններ, մեղմ ասած, որը ճիշտ չի լինի։ Չեմ կարծում, որ սեպարատ պայմանավորվածությունները կարող են դրական վերջաբան ունենալ»։
