«Հյուսիսային հոսք-2» գազամուղի մատակարարումները կսկսվեն 2019 թվականի վերջին կամ 2020 թվականի սկզբին: Այս մասին հայտարարել է Nord Stream 2 AG- ի առեւտրային տնօրեն Ռեյնխարդ Օնտիդը՝ ելույթ ունենալով Flame համաժողովին, հաղորդում է ՏԱՍՍ-ը:
Նրա խոսքով՝ ընկերությունը հուսով է, որ շինարարության ժամանակացույցի համաձայն, մնացած թույլտվությունները կստանա առաջիկա ամիսներին: Նա նաեւ ավելացրել է, որ «Հյուսիսային հոսք-2»-ի շինարարությունը ժամանակացույցով է կատարվում:
«Nord Stream 2-ի անունից մենք եւս մեկ անգամ հաստատում ենք, որ «Հյուսիսային հոսք-2» գազատարի շահագործումը նախատեսվում է 2019 թվականի վերջին», - ասվում է ընկերության մեկնաբանության մեջ:
«Հյուսիսային հոսք-2» գազամուղի նախագիծը ենթադրում է գազատարի երկու ճյուղի կառուցում՝ տարեկան ընդհանուր 55 միլիարդ խորանարդ մետր գազ մատակարարմամբ:
Խողովակաշարի երթուղին անցնում է Ռուսաստանի եւ Գերմանիայի տարածքային ջրերի եւ Ռուսաստանի, Ֆինլանդիայի, Շվեդիայի, Դանիայի եւ Գերմանիայի բացառիկ տնտեսական գոտիների միջով:
