Թուրքիայի արտգործնախարարությունը Ստամբուլում Իսրայելի գլխավոր հյուպատոսին կոչ է արել ժամանակավորապես վերադառնալ հայրենիք: Այս մասին հաղորդում է Անատոլիական գործակալությունը՝ վկայակոչելով արտաքին գործերի նախարարության աղբյուրը:
Այս հարցով Թուրքիայի արտաքին գործերի նախարարության հաստատումը ստանալ դեռ չի հաջողվել:
Ավելի վաղ՝ երեքշաբթի օրը, Թուրքիայում Իսրայելի դեսպան Էյթան Նայեն հրավիրվել էր Թուրքիայի ԱԳՆ, որտեղ նրան առաջարկվել էր ժամանակավորապես լքել երկիրը: Նրան նաեւ տեղեկացրել էին Գազայի հատվածում տեղի ունեցած իրադարձությունների կապակցությամբ խորհրդակցությունների համար Թուրքիայի դիվանագիտական առաքելության ղեկավարին Թել-Ավիվից հետ կանչելու մասին:
Հիշեցնենք, որ մայիսի 14-ին Իսրայելի՝ Գազայի հետ սահմանին դաժան բախումներ էին սկսվել իսրայելական զինվորականների եւ պաղեստինցի ցուցարարների միջեւ, պատճառ էր հանդիսացել նույն օրը Երուսաղեմում ԱՄՆ դեսպանատան պաշտոնական բացումը: Վերջին տվյալներով՝ բախումների ընթացքում ավելի քան 60 պաղեստինցի է զոհվել, մոտ 2.7 հազար մարդ վիրավորվել է: