Վաշինգտոնում Պաղեստինի ազգային վարչության ներկայացուցիչ Հուսամ Զոմլոտը վարչակազմի ղեկավար Մահմուդ Աբբասի հրահանգով լքում է ԱՄՆ-ն, փոխանցում է «Ինտերֆաքս»-ը՝ վկայակոչելով Associated Press գործակալությունը: «Երբ նրանք դեսպանություն բացեցին Երուսաղեմում, մենք ստիպված էինք եւս որոշում կայացնել, դա մեր որոշումն էր», - մեկնաբանելով պաղեստինյան վարչակազմի յաս քայլը՝ նշել է Պաղեստինի արտաքին գործերի նախարար Ռիադ Մալիկին:
Նախօրեին հաղորդվել էր, որ Պաղեստինի ղեկավարությունը մտադիր է դատական հայց ներկայացնել Միջազգային քրեական դատարան՝ մեղադրելով Իսրայելին ռազմական հանցագործությունների համար «գրավյալ տարածքներում բնակավայրերի կառուցման պատճառով»:
Հիշեցնենք, որ մայիսի 14-ին Իսրայելի՝ Գազայի հետ սահմանին դաժան բախումներ էին սկսվել իսրայելական զինվորականների եւ պաղեստինցի ցուցարարների միջեւ, պատճառ էր հանդիսացել նույն օրը Երուսաղեմում ԱՄՆ դեսպանատան պաշտոնական բացումը: Վերջին տվյալներով՝ բախումների ընթացքում ավելի քան 60 պաղեստինցի է զոհվել, մոտ 2.7 հազար մարդ վիրավորվել է: