Լոռու մարզում մարտի 1-ին 24-ամյա երիտասարդի կողմից չեխ կնոջ նկատմամբ սեքսուալ բնույթի բռնի գործողություններ կատարելու գործով դատաքննությունն անցկացվում է դռնփակ: Այս մասին NEWS.am-ին ասաց գործով ամբաստանյալ Արմեն Ֆ.-ի պաշտպան Կարինե Գասպարյանը:
Այս գործով դատաքննությունը դեռ շարունակվում է, նախորդ դատական նիստին ցուցմունք է տվել տուժող կողմը: Հարցին՝ արդյոք ամբաստանյալն ընդունում է իրեն առաջադրված մեղադրանքը, պաշտպանը հրաժարվեց պատասխանել:
Ըստ մեղադրանքի՝ Արմեն Ֆ.-ն մարտի 1-ին ժամը 19:30-ի սահմաններում Էվա Յ.-ի կամքին հակառակ ցանկացել է կատարել սեռական բնույթի գործողություններ:
Արմենին մեղադրանք է առաջադրվել Քրեական օրենսգրքի 139-րդ հոդվածի 1-ին մասով (սեքսուալ բնույթի բռնի գործողությունները): Տղամարդը կալանավորված է:
Ավելի վաղ Քննչական կոմիտեն հայտնել էր, որ 2018թ. մարտի 2-ին Չեխիայի Հանրապետության քաղաքացի հանդիսացող 28-ամյա աղջիկը հաղորդում է տվել, որ մարտի 1-ին մի երիտասարդ փորձել է բռնությամբ սեքսուալ բնույթի գործողություններ կատարել իր նկատմամբ:
Դեպքի առթիվ հարուցված քրեական գործի շրջանակում պարզվել է ենթադրյալ հանցագործություն կատարած անձի ինքնությունը, որը Լոռու մարզի բնակիչ է՝ ծնված 1994 թվականին: Նախնական քննությամբ փաստական տվյալներ են ձեռք բերվել, որ դեպքի օրը՝ ժամը 19։30-ի սահմաններում, օտարերկրացի 28-ամյա աղջիկը Գուգարքում հեծանվով զբոսնելիս մոլորվել է եւ հայտնվել ամայի դաշտում, որտեղ նրան է մոտեցել մի երիտասարդ եւ օգտվելով շրջակա տարածքում մարդկանց բացակայությունից՝ սեքսուալ բնույթի բռնի գործողություններ է կատարել աղջկա նկատմամբ:
