Արտաքին գործերի նախարարությունը վերադասի գայտարարությունները չի մեկնաբանում: Այսօր՝ մայիսի 16-ին, խորհրդարանում լրագրողների հետ զրույցում նման կարծիք հայտնեց ԱԳ փոխնախարար Շավարշ Քոչարյանը՝ անդրադառնալով վարչապետ Նիկոլ Փաշինյանի հայտարարությանը, թե Ղարաբաղը պետք է բանակցային կողմ դառնա:
«Մենք մեկնաբանում ենք այլ պետությունների ներկայացուցիչների հայտարարությունները»,- ասաց նա:
Հարցին, թե նոր նախարարի հետ ինչպես է պատկերացնում իր աշխատանքը, փոխնախարարն արձագանքեց. «Բայց աշխատում ենք մենք, ինչի՞ մասին է խոսքը: Նախարարությունը աշխատել է մինչ այդ, աշխատել է հեղափոխության ընթացքում ու աշխատում է հիմա: ԱԳՆ-ն այն կառույցներից մեկն է, որ անկախ իրարանցումներից, պետք է ժամացույցի պես աշխատի ու աշխատել է»:
Ինչ վերաբերվում է ԱԳ նորանշանակ նախարար Զոհրաբ Մնացականյանին, Շավարշ Քոչարյանն ընդգծեց. «Պարոն Մնացականյանը կադրային պրոֆեսիոնալ դիվանագետ է, շատ լուրջ ճանապարհ անցած, եղել է նաեւ փոխնախարար եւ ընդհանուր առմամբ, կառույցը շատ բավարարված է»:
Լրագրողների հարցին՝ նախարարի տեղակալները չեն պատրաստվում հրաժարական ներկայացնել, Քոչարյանը նշեց, որ իրենք սովորական աշխատանքային ռեժիմի մեջ են: Դիտարկմանը՝ ձեզ ոչինչ չի ասվե՞լ, նա արձագանքեց. «Մի բան ասվել է: Երբ որ ներկայացվել է, ասվել է նրա մասին, որ կառույցը կայացած է, աշխատում է վարչապետի կողմից եւ պետք է զերծ մնալ քաղաքական ազդեցությունից» :