Երուսաղեմում Գվատեմալայի դեսպանատան բացման արարողությունը տեղի է ունեցել չորեքշաբթի օրը՝ Միացյալ Նահանգների կողմից ԱՄՆ դեսպանատուննը Թել-Ավիվից Երուսաղեմ տեղափոխելուց մի քանի օր անց: Այս մասին հաղորդում է «Ինտերֆաքս»-ը՝ վկայակոչելով Jerusalem Post-ը:
Երուսաղեմի արեւմտյան մասում Գվատեմալայի նոր դեսպանատան բացման արարողությանը ներկա էին Իսրայելի վարչապետ Բենիամին Նեթանյահուն եւ Գվատեմալայի նախագահ Ջիմի Մորալեսը:
Արարողության ժամանակ Նեթանյահուն հիշեցրել է, որ Գվատեմալան Միացյալ Նահանգներից հետո երկրորդ երկիրն է դարձել, որը 70 տարի առաջ ճանաչել է Իսրայելը որպես անկախ պետություն: «Դուք միշտ առաջիններից եք: Մենք հիշում ենք մեր բարեկամներին, եւ Գվատեմալան մեր բարեկամն է՝ առաջ եւ հիմա»,- հայտարարել է Իսրայելի վարչապետը:
Հիշեցնենք, որ մայիսի 14-ին Իսրայելի՝ Գազայի հետ սահմանին դաժան բախումներ էին սկսվել իսրայելական զինվորականների եւ պաղեստինցի ցուցարարների միջեւ, պատճառ էր հանդիսացել նույն օրը Երուսաղեմում ԱՄՆ դեսպանատան պաշտոնական բացումը: Վերջին տվյալներով՝ բախումների ընթացքում ավելի քան 60 պաղեստինցի է զոհվել, մոտ 2.7 հազար մարդ վիրավորվել է:
