«Սասնա ծռերի» գործով 10 ամբաստանյալների պաշտպաններն այսօր' մայիսի 16-ին, իրենց պաշտպանյալների խափանման միջոցը փոխելու վերաբերյալ միջնորդություն ներկայացրեցին:
Միջնորդությունը ներկայացնելուց հետո ամբաստանյալներից Պավլիկ Մանուկյանը հանդես եկավ կոչով: Նա հանրության կոչ արեց փողոց փակել և հանրային ճնշում գործադրել դատավոր Մեսրոպ Մակյանի վրա, որ նա կարողանա արդար վճիռ կայացնել. «Ես գրավ չեմ կարող մուծել, որ ազատության մեջ լինեմ, քանի որ կատարելով պարտքս ժողովրդիս առաջ՝ պարտքով եմ ապրում: Ինձնից առաջ պետք է ազատության մեջ լինեն Սմբատ Բարսեղյանը և Արմեն Բիլյանը»:
Նշենք, որ Սմբատ Բարսեղյանը և Արմեն Բիլյանը մեղադրվում են ոստիկանների սպանության մեջ: Դատավորը նշեց, որ կարող էր Պավլիկ Մանուկյանի նկատմամբ սանկցիա կիրառել, քանի որ նա փողոց փակելու կոչ է անում, սակայն դա չի անի: Դատական նիստը շարունակվում է լարված պայմաններում:
Ամբաստանյալներից Սեդրակ Նազարյանն էլ իր ելույթում նշեց, որ այսօր պատմական օր չէ, թող իզուր չոգեւորվեն, քանի որ դատավոր Մակյանը խորհրդակցական սենյակից գալով մերժելու է ներկայացրած միջնորդությունները:
Մեղադրանքի կողմը հայտարարեց, որ պաշտպանական կողմի միջնորդությունները անհիմն են եւ ենթակա են մերժման: Դահլիճում գտնվողները սուլոցներով եւ «դավաճան» վանկարկումներով արձագանքեցին մեղադրող Պետրոս Պետրոսյանի ելույթին:
Դատավորը դատական սանկցիա կիրառեց Արեգ Կյուրեղյանի նկատմամբ եւ 10 ժամով նրան հեռացրեց նիստերի դահլիճից, երբ առանց թույլտվության փորձեց դուրս գալ նիստերի դահլիճից:
