«Սասնա ծռերի» աջակիցները այս պահին երկկողմանի փակել են Արշակունյաց պողոտան: NEWS.am-ի թղթակիցը հաղորդում է, որ նրանք պահանջում են դատավոր Մեսրոպ Մակյանից արդար որոշում կայացնել եւ բավարարել «Սասնա ծռերի» փաստաբանների միջնորդությունը՝ նրանց խափանման միջոց կալանքը փոխելու վերաբերյալ:
«Սասնա ծռերից» Գագիկ Եղիազարյանի որդին՝ Դավիթը, հայտարարեց, որ ճանապարհ փակելով իրենք նաեւ դատարանից պահանջում են ժամը 16.00-ից ավելի շուտ որոշում կայացնել, այլապես իրենք կփակեն նաեւ Փեթակի խաչմերուկը:
Հիշեցնենք, որ քիչ առաջ դատական նիստի ժամանակ Պավլիկ Մանուկյանը բոլորին կոչ արեց դուրս գալ փողոց, փակել փողոցները եւ այդկերպ ճնշում գործադրել, որ արդար դատական որոշում կայացվի:
«Սասնա ծռերի» աջակիցները վանկարկում են «Սասնա ծռեր» եւ վարորդներին կոչ են անում միանալ իրենց: Նրանք մեքենաներին պաստառներ են փակցնում՝ «Սասնա ծռերին» ազատելու կոչով:
