Հեղափոխությամբ իշխանության գալը դեռ չի նշանակում, որ հեղափոխությունն անպայման կբերի կոռուպցիայի մակարդակների նվազման: Այս մասին, այսօր՝ մայիսի 16-ին, լրագրողների հետ հանդիպման ժամանակ նշել է «Թրանսփերենսի ինթերնեյշնլ» հակակոռուպցիոն կենտրոնի ղեկավար Վարուժան Հոկտանյանը՝ հավելելով, որ դա է ցույց տալիս մի քանի երկրների փորձը:
Հոկտանյանը նկատեց, որ ինչպես հեղափոխությունն էր ժողովրդական պահանջ, այնպես էլ կոռուպցիայի հաղթահարումն է այդպիսի պահանջ լինելու:
Նրա խոսքով, 2008 թվականից իշխանությունը ձուկը գլխից բռնելու մասին հայտարարություններ է անում, բայց 10 տարվա ընթացքում այդպես էլ մեծ ձկներին չբռնեցին. «Հուսանք, որ այս իշխանությունների դեպքում քաղաքական կամքը կհերիքի ոչ միայն օրենքներ ընդունելուն»:
Հոկտանյանը նշեց, որ օրենքների մակարդակով իրավիճակն այնքան էլ վատը չէ, սակայն այդ օրենքները շատ հաճախ չեն գործում:
