Մոսկվայում մահացած են գտել «Եդինայա Ռոսիա» կուսակցության փորձագիտական խորհրդի անդամ, կուսակցության բարձրագույն խորհրդի նախկին անդամ Յուրի Կոտլերին, հայտնում է ՏԱՍՍ-ը։
Պարբերականի աղբյուրի տվյալներով՝ Կոտլերը հայտնաբերվել է գլխի հրազենային վնասվածքով «Բոլշայա Նիկիտսկայա» փողոցի իր բնակարանում։ Ենթադրվում է, որ նա ինքնասպանություն է գործել։ Դիակի կողքին հրացան է հայտնաբերվել, հայտնում են «ՌԻԱ Նովոստի»-ն եւ «Կոմերսանտ»-ը։
Դեպքի վայրում գրառում է հայտնաբերվել, որից պարզ է դառնում, որ ինքնասպանությունը կատարվել անձնական դրդապատճառներով, հայտնել է ՌԲԿ-ն։
РЕН ТВ-ի տեղեկությամբ, Յուրի Կոտլերը երեք օր շարունակ կապի դուրս չի եկել։ Քաղաքական գործչին սկսել է փնտրել նրա օգնականը։ Չկարողանալով գտնել նրան՝ նա ոստիկանություն է ահազանգել, որ բացեն նրա բնակարանի դուռը։
Mash-ի Տելեգրամի ալիքի տվյալներով՝ ոստիկանություն է ահազանգել Կոտլերի վարորդը այն բանից հետո, երբ Կոտլերին սկսել է փնտրել նրա կինը, որը գտնվում է Ֆրանսիայում։ Կոտլերի բնակարանի սեղանին եղել է հրացանի վկայականը եւ «Եդինայա Ռոսիա» կուսակցության անդամատոմսը:
Կոտլերը 2013 թվականից եղել է ՎՏԲ բանկի ավագ փոխնախագահ։ Բանկի մամուլի ծառայությունից «ՌԻԱ Նովոստի»-ն հայտնել են, որ 2015 թվականի դեկտեմբերից նա այլեւս այնտեղ չի աշխատում։
2018 թվականի փետրվարին «Եդինայա Ռոսիա»-ն հայտնել է, որ նա ընդգրկվել է կուսակցության փորձագիտական խորհրդում։