Գլենդելում բնակվող ՀՀ քաղաքացի Արմեն Սափլեքչյանը իրեն մեղավոր է ճանաչել բանկային մեքենայությունների ու անձնական տվյալների գողության մեջ։ 37-ամյա Սափլեքչյանը 6 այլ անձանց հետ ներգրավվել է էլեկտրոնային 18 հազար բանկային քարտերի եւ անձնական տվյալների գողության մեջ։ Այսպես, հանցագործները բենզալցակայաններում վճարային համակարգերին սքիմերներ են ամրակցել եւ հավաքել են տեղեկությունները, երբ հաճախորդը քարտը տեղադրել է այնտեղ, ապա ծածկագրել են գողացված քարտերի համարները այլ վճարային քարտերին, որոնք օգտագործել են տարբեր նահանգներում, հայտնում է Alexandria News-ը։
Մեղադրանք է առաջադրվել նաեւ 37-ամյա Տիմբուրեկ Խասանովին, 28-ամյա Մուշեղ Մելքոնյանին, 47-ամյա Անատոլի Զինչենկոյին։ Մեքենայության մեջ իրենց մեղքն խոստովանել են նաեւ 31-ամյա Ռուդոլֆ Մեխակյանը, 25-ամյա Ռադիկ Կարապետյանը, 23-ամյա Սիրանուշ Ենգիբարյանը եւ Անատոլի Զինչենկոն։ Սափլեքչյանի դատավճիռը կհրապարակվի օգոստոսի 31-ին։
