Երեւանի ընդհանուր իրավասության դատարանի Ավան եւ Նոր Նորք նստավայրում շարունակվում է Կարո Եղնուկյանի եւ «Սասնա ծռեր» 10 անդամի գործով դատական նիստը: Նշենք, որ գործով ամբաստանյալները դատարան չեն բերվել: Նախագահող դատավոր Արտուշ Գաբրիելյանը հայտնեց, որ ուղեկցող գումարտակ չկա:
Կարո Եղնուկյանի շահերի պաշտպան Տիգրան Հայրապետյանը նշեց, որ առանց իր պաշտպանյալի ներկայության էլ հնարավոր է քննարկել նրա խափանման միջոցը փոխելու հարցը:
«Եթե խնդիր կա, որոշ ժամանակով ընդմիջենք նիստը, եւ գուցե ընթացքում ուղեկցող գումարտակ գտնվի եւ տղաները ներկայացվեն դատարան»,- նշեց փաստաբանը:
«Դուք միշտ խոսել եք դատավարության ողջամիտ ժամկետի մասին, սակայն հիմա ինչ-որ ուղեկցողներ գրիպ են կպել, կամ տրամադրության անկում ունեն դուք ողջամիտ եք համարում դատը հետաձգելը»,- փաստաբան Մուշեղ Շուշանյանը հավելեց:
Խաչատուր Գիչյանի պաշտպան Մարինե Ֆարմանյանը եւս միջնորդեց չհետաձգել դատավարությունը եւ քննել իր պաշտպանյալի խափանման միջոցը փոխելու վերաբերյալ միջնորդությունը:
Փաստաբան Նինա Կարապետյանցը պահանջեց իրենց պաշտպաններին անհապաղ բերել դատարան եւ կատարվածը սաբոտաժ որակեց:
«Սասնա ծռերի» հարազատներն էլ կատարվածում դիտավորություն են տեսնում: