Իսրայելի վարչապետ Բենիամին Նեթանյահուն երկերեսանիության եւ կանխակալության մեջ է մեղադրել ՄԱԿ-ի Մարդու իրավունքների հարցերով խորհրդին, որն արտոնել է հրեական պետության զինված ուժերի հետ բախումների հետեւանքով ավելի քան 100 պաղեստինցիների մահվան միջազգային հետաքննության անցկացումը: Այս մասին գրում է ՌԻԱ Նովոստին:
«Կազմակերպությունը, որը իրեն Մարդու իրավունքների հարցերով խորհուրդ է կոչում, նորից ապացուցում է, որ երկերեսանի է եւ կանխակալ, որ իր նպատակն է վնաս հասցնել Իսրայելին եւ սատարել ահաբեկչությունը»,- Twitter-ում գրել է Նեթանյահուն:
Նա կրկնել է, որ մերժում է բանաձեւը, որը, նրա խոսքով, ընդունվել է «ավտոմատ հակաիսրայելական մեծամասնության կողմից, որի որոշումը նախապես հայտնի էր»:
«Իսրայելը կշարունակի պաշտպանել իր քաղաքացիներին եւ զինվորներին, քանի որ ինքնապաշտպանության իրավունք ունի»,- ասված է հրապարակման մեջ: