Մեքսիկան պատրաստ է օգնություն տրամադրել նախօրեին Հավանայի օդանավակայանի մոտ տեղի ունեցած Boeing-737 օդանավի վթարի հանգամանքների հետաքննության հարցում։ Այս մասին իր Twitter-ում հայտնել է երկրի նախագահ Էնրիկե Պենյա Նյետոն, հայտնում է ՏԱՍՍ-ը։
«Կուբայում Մեքսիկայի դեսպանատունը ուշադիր հետեւում է տեղի ունեցածին ու Կուբայի իշխանություններին տեխնիկական աջակցություն է առաջարկել վթարի հետաքննության համար»,- գրել է պետության նախագահը։ Նա նաեւ ցավակցել է Կուբայի ժողովրդին ու կառավարությանը՝ այդ ողբերգության կապակցությամբ։
Նշենք, որ Մեքսիկայի իշխանությունները Կուբա են ուղարկելու մասնագետների օդանավի հետաքննության համար։
«Վաղը Կուբա կժամանեն երկու մասնագետներ՝ ինժեներ Խոսե Արմանդո Կոնստանտինո Տերսերոն, ավիացիոն միջադեպերի վերլուծության հարցերով տնօրենը ու ինժեներ Կարլոս Կրուս Գարսիան՝ ավիացիոն միջադեպերի հարցերով մասնագետ»,- ասվում է գերատեսչության հայտարարության մեջ։
Prensa Latina գործակալությունը փոխանցում է, որ օդանավի սեւ արկղերը դեռ չեն գտնվել։
