Մեր ինքնության այս շրջանի պատմության կարեւորագույն սյուներից Արցախն ամենակարեւորն է։ Այդ մասին ասել է Հայաստանի ԱԳ նախարար Զոհրաբ Մնացականյանը՝ Արցախի նախագահի հետ հանդիպումից հետո լրագրողների հետ զրույցում։
Հարցին, թե ինչ է քննարկվել Բակո Սահակյանի հետ, Զոհրաբ Մնացականյանը պատասխանել է. «Մենք խոսել ենք սկզբունքների մասին, խոսել ենք այն մասին, թե ինչ նշանակություն ունի Արցախը Հայաստանի համար, խոսել ենք Արցախի անվտանգության, Արցախի զարգացման մասին:
Խոսել ենք նաեւ այն մասին, որ Արցախը վերաբերում է ողջ հայությանը, որովհետեւ մեր ինքնության այս շրջանի պատմության կարեւորագույն սյուներից Արցախն ամենակարեւորն է: Եվ այդ առումով սա մեր միասնական պատասխանատվությունն է:
Ցանկացած մարդ, ով գտնվում է Արցախում, զգում է, որ այս շրջանում մարդիկ ապրում են յուրահատուկ պայմաններում, եւ դա չզգալը, անընդունելի է, անկարելի:
Յուրահատուկ պայմաններ են այն առումով, որ կա վտանգ, կա հակառակորդ, կա ֆիզիկական անվտանգության հարց: Եվ մեր համախմբվածությունը եւ մեր միասնական ուժը վերաբերում է բոլորիս: Սա բոլորիս հարցն է: Այդ առումով է, որ չափազանց կարեւոր է լինել այստեղ, զգալ այդ ոգին, այդ պատասխանատվությունը եւ կրել այդ պատասխանատվությունը»:
Նա նաեւ նշել է, թե դիվանագիտական ճակատում առաջնահերթությունների շարքում լինելու է Արցախը: «Եղել է, կա եւ մնում է: Լինելու է մինչեւ այն պահը, մինչեւ որ վստահ չլինենք, ինչպես որ ասացի, որ Արցախի անվտանգությունը, Արցախի զարգացումն ընթանում է իր բնականոն ուղիով»:
