Հայաստանի նոր կառավարությունը պետք է զբաղվի գինեգործական արդյունաբերության մի քանի հիմնական խնդիրներով։ Այս մասին մայիսի 19-ին լրագրողների հետ հանդիպման ժամանակ հայտնել է Հայաստանի գինեգործների միության նախագահ Արտակ Սարգսյանը։
Առաջին խնդիրը, նրա խոսքով, գյուղացիների ու գինեգործական ձեռնարկությունների միջեւ փոխշահավետ պայմանագրային պարտականությունների բացակայությունն է ․ «Չլսված բան է, որ խաղողը իրացվի ինքնարժեքին հավասար կամ նույնիսկ դրանից ցածր գներով։ Դրա պատճառով գյուղացիները չեն կարողանում զարգացնել իրենց բիզնեսն ու օգտվել վարկային ծրագրերից»,- պարզաբանել է Սարգսյանը։
Անցած տարի, նկատեց նա, գինեգործական ընկերությունները գյուղացիներից խաղող են գնել 100-130 դրամով, ընդ որում նրանցից շատերը մինչեւ այս տարվա ապրիլ իրենց պարտքը չէին մարել։
Երկրորդ ՝ ոչ նվազ կարեւոր խնդիրը, ըստ Գինեգործների միության ղեկավարի, այն է, որ վերամշակող ձեռնարկությունների 70 տոկոսը որպես հումք օգտագործում է ներմուծվող էժանագին սպիրտ, ներկանյութեր, այլ ոչ թե մաքուր հայկական տեսակների խաղող, ինչը ոչ միայն գյուղացիներին է վնասում, այլեւ հայկական կոնյակի հեղինակությանը։ Այս մասին է վկայում անցած տարի կոնյակի արտադրության ծավալը, որը զգալիորեն գերազանցում էր խաղողի բերքի ծավալը։ «Նոր կառավարությունը պետք է ընդամենը մեկ քայլ անի՝ սահմանափակի էժանագին սպիրտի գործածումը, դրանով իսկ կրճատելով դրա հասանելիությունը»,- շեշտել է Արտակ Սարգսյանը։
Նաեւ, ըստ փորձագետի, Կառավարությունը պետք է ներդնի բազմամյա գոյւղատնտեսական կուլտուրաների ապահովագրություն, այդ թվում խաղողի, որպեսզի գյուղացին, որին վնաս է հասցվել տարերային աղետների հետեւանքով, նման աղետալի վիճակում չգտնվի, այլ մտածի, թե ինչպես հետագայում զարգացնի բիզնեսը։
«Սպառողների խորհրդատվության կենտրոն» ՀԿ-ի նախագահ Կարեն Չիլինգարյանը իր հերթին նշեց, որ անհրաժեշտ է զբաղվել նաեւ հայկական կոնյակի կեղծիքների վերացումով, որոնց մեծ մասը ռուսական շուկա է արտահանվում։ «Նաեւ պետք է մտածել գինեգործության զարգացման մասին, ինչը Հայաստանում մեծ հեռանկարներ ունի»,- ասել է Չիլինգարյանը։
