Իրաքի խորհրդարանական ընտրություններում հաղթել է շիա մուսուլմանների հոգեւոր առաջնորդներից մեկի ՝ Մուկտադ աս- Սադրի դաշինքը։ Ընտրությունների վերջնական արդյունքներից հետեւում է, որ աս- Սադրի դաշինքը խորհրդարանում 54 տեղ է ստացել, հայտնում է DW-ն։
Նրանց հաջորդում են «Ֆաթհ» իրանամետ դաշինքը ՝ 47 տեղերով ու վարչապետ Հեյդար ալ-Աբադիի կողմնակիցները՝ 42 տեղ ։
Ընդ որում հասկանալի չէ, թե ինչ ուժեր են ձեւավորելու կառավարական կոալիցիան։ 44-ամյա աս-Սադրն ամեն դեպքում չի կարող զբաղեցնել վարչապետի պաշտոնը, քանի որ նա պաշտոնապես չի մասնակցել ընտրություններին։ Նրա ենթակայության տակ գտնվող ռազմական ջոկատները 2003-ից սկսած մասնակցել են ամերիկացի զինվորների դեմ մարտերին։ Վերջին տարիներին աս- Սադրը համարվում էր Բաղդադում քաղաքական իսթեբլիշմենթի ամենաակտիվ քննադատներից մեկը։ Նախընտրական քարոզչության ընթացքում աս- Սադրը պահանջել է բարեփոխումներ, այդ թվում սոցիալական քաղաքականությունում։ Նրա դաշինքը ընտրություններին մասնակցում էր կոմունիստների հետ միասին։
Խորհրդարանի 329 տեղերին հավակնում էր գրեթե 7 հազար մարդ, որոնք ներառված էին 87 կուսակցական ցուցակներում։ Ըստ Իրաքի սահմանադրության՝ խորհդրարանի խոսնակը պետք է լինի սունիների ներկայացուցիչ, վարչապետը՝ շիաների, նախագահն էլ՝ քրդերի։