Հայաստանում ազգային փոքրամասնությունների ներկայացուցիչները Ծիծեռնակաբերդի հուշահամալիրում հարգանքի տուրք մատուցեցին Պոնտոսի հույների ցեղասպանության զոհերի հիշատակին:
Պոնտոսի հույների ցեղասպանության զոհերի հիշատակին հարգանքի տուրք մատուցելու համար Ծիծեռնակաբերդի հուշահամալիրում էին նաեւ Հայաստանի Ազգային ժողովում ազգային փոքրամասնությունները ներկայացնող պատգամավորները` քրդական համայնքի ղեկավար Կնյազ Հասանովը, ասորական համայնքի ղեկավար Արսեն Միխայլովը, եզդիական համայնքի ներկայացուցիչ Ռուստամ Մախմուդյանը:
Ծիծեռնակաբերդի հուշահամալիրում էին նաեւ Ազգային ժողովի փոխնախագահ Էդուարդ Շարմազանովը եւ ՀՀԿ խմբակցության պատգամավոր Տաճատ Վարդապետյանը:
Ազգային փոքրամասնությունների ներկայացուցիչներն ու ԱԺ պատգամավորները ծաղիկներ խոնարհեցին Ցեղասպանության զոհերի հիշատակը հավերժացնող անմար կրակի մոտ, որից հետո կատարվեց հոգեհանգստի կարգ:
ԱԺ փոխնախագահ Էդուարդ Շարմազանովը լրագրողների հետ զրույցում հիշեցրեց, որ Հայաստանի խորհրդարանը 2015թ. միաձայն ճանաչել է Պոնտոսի հույների ցեղասպանությունը: «Ինձ համար մեծ պատիվ է, որ ես այդ հարցի հիմնական զեկուցողն եմ եղել: Միեւնույն ժամանակ մենք մեր հույն եւ Կիպրոսի գործընկերների հետ աշխատանք ենք իրականացրել եւ հաջող պայքար ենք մղել ժխտողականության դեմ: Թե Հունաստանը, թե Կիպրոսը միաձայն դատապարտել են թուրքական ժխտողականությունը, սակայն սա բավարար չէ: Մենք պետք է կարողանանք համադրել հունական, ասորական եւ հայկական սփյուռքի միասնությունը, մեր պետությունների միասնությունը ընդդեմ թուրքական ժխտողականության»,- ասաց Շարմազանովը:
Նրա խոսքով` քանի դեռ կա ժխտողականություն, վտանգ կա, որ նոր ցեղասպանություններ կլինեն. «Ավելին` թուրքական ժխտողականության հետեւանք էին թե 1988թ. սումգայիթյան ջարդերը, թե ապրիլյան պատերազմում Ադրբեջանի հակամարդային գործողությունները եւ խաղաղ բնակչության, եւ զինվորների նկատմամբ: Մի բան պարզ է` մենք պայքարող ժողովուրդ ենք եւ պետք է պայքարենք: Մենք հաղթելու ենք, որովհետեւ Աստված է մեզ հետ եւ որովհետեւ մեր պայքարը ոչ թե ընդդեմ է, այլ հանուն ազատության ու մարդու իրավունքների պաշտպանության է»:
Շարմազանովն ընդգծեց, որ իր համար եւ ապրիլի 24-ը, եւ մայիսի 19-ը նախեւառաջ վերածննդի օր են: «Այդ օրերը ինձ համար ոչ թե լացելու, այլ վերաիմաստավորելու, ազգային համախմբման օրեր են: Բնականաբար, ես եւ հունական, եւ հայկական ցեղասպանության ժառանգորդն եմ: Ես հայրական կողմով հունական ծագում ունեմ, մայրական կողմով՝ հայկական: Ինչպես ասել եմ` ես 100 տոկոսով հույն եմ ու հարյուր տոկոսով հայ եմ: Եվ դա ինձ կրկնակի ուժ է տալիս կրկնակի եռանդով պայքարել ոչ միայն Հայոց ցեղասպանության ճանաչման, այլ նաեւ Պոնտոսի հույների ցեղասպանության միջազգային ճանաչման համար: Մենք ունենք շատ լավ փորձ եւ միասնաբար պետք է պայքարենք»,- եզրափակեց ԱԺ փոխխոսնակը:
Հայաստանի խորհրդարանը 2015թ. մարտի 24-ին միաձայն ընդունել է Օսմանյան Թուրքիայում Պոնտոսի հույների եւ ասորիների ցեղասպանությունը դատապարտող հայտարարությունը: Հայտարարությանը միաձայն կողմ է քվեարկել 117 պատգամավոր: Պոնտոսի հույների ցեղասպանությունը պաշտոնապես ճանաչել ու դատապարտել են նաեւ Հունաստանը, Կիպրոսը, Շվեդիան:
