Թեհրանը եվրոպական պետություններից միջուկային գործարքին հետեւելու հստակ երաշխիքներ է ակնկալում: Այդ մասին, ինչպես հաղորդում է «ՏԱՍՍ»-ը՝ վկայակոչելով Tasnim լրատվական գործակալությունը, հայտարարել է Իրանի ղեկավար Այաթոլլահ Ալի Խամենեիի միջազգային հարցերով խորհրդական Ալի Աքբար Վելայաթին:
«Պետք է հստակ եվրոպական երաշխիքներ լինեն, որպեսզի գործարքը միակողմանի համաձայնության չվերածվի: Ես առանց գործնական երաշխիքներ ստանալու բացարձակ վստահություն չունեմ եվրոպական երկրների դիրքորոշման հարցում, քանի որ հակասական հայտարարությունները կասկածի տեղիք են տալիս»,- ասել է Վելայաթին:
Վելայաթի խոսքով՝ «ԵՄ որոշ անդամներ հայտարարում են միջուկային համաձայնագրին եւ Իրանի հետ տնտեսական համագործակցության ամրապնդման հեռանկարներին իրենց կողմնակցության մասին, մինչդեռ մյուս եվրոպական երկրներն ասում են, որ ԱՄՆ-ին հակադրվելու անհրաժեշտություն չկա»: «Նման հակասությունը չի կարող կասկած չհարուցել»,- ասել է նա:
Իրանի առաջնորդի խորհրդականը քննադատել է ֆրանսիական Total նավթագազային կորպորացիայի որոշումն արդեն իսկ կնքված պայմանագրերի չեղարկման մասին: «Սա պարզապես անհեթեթության թատրոն է»,- ասել է նա՝ հավելելով, որ ֆրանսիացիները բացատրել են իրենց որոշումն «ԱՄՆ-ի ճնշմանը դիմակայելու անկարողությամբ»: «Ուստի Իրանի համար կարեւոր է լուրջ երաշխիքներ ստանալ Եվրոպայից»,- ընդգծել է նա: