Կուտակային կենսաթոշակային համակարգը պետք է լինի կամավորության սկզբունքով: Այս մասին այսօր՝ մայիսի 21-ին, Ազգային ժողովում լրագրողների հետ զրույցում նշեց «Ելք» դաշինքի օատգամավոր Գեւորգ Գորգիսյանը:
«Մենք որ շարժումը սկսել էր, ասում էինք՝ Կուտակային կենսաթոշակային մոդելը շատ լավ կիրառում ունի աշխարհում, բայց էն տարբերակը, որ բերվում էր Հայաստան, աբսուրդ էր եւ դրա դեմ պայքարում էինք ու պահանջում, որ լինի կամավոր»,-ասաց Գեւորգ Գորգիսյանը:
Նա հավաստիացրեց, որ աշխատանքի եւ սոցիալական հարցերի նախարար Մանե Թանդիլյանը նույնպես այդ կարծիքին է:
«Մենք ժամանակին աշխատել ենք դրա վրա, հիմա այլ իրավիճակ է, կքննարկենք տիկին նախարարի հետ եւ կհասկանանք: Մի իրավիճակ էլ է փոխվել, որ ՀՀ քաղաքացիները վստահում են կառավարությանը: Ես վստահ եմ, որ Թանդիլյանի ցանկացած որոշում լինելու է հիմնավոր: Թանդիլյանի հայտարարությունից կարելի է վստահ լինել, որ սկզբունքները պահպանվում են»:
Նշենք, որ Աշխատանքի եւ սոցիալական հարցերի նախարար Մանե Թանդիլյանը եւ «Ելք» խմբակցության պատգամավոր Գեւորգ Գորգիսյանը «Դեմ եմ» շարժման ակտիվիստներից էին, որոնք պայքարում էին պարտադիր կուտակային կենսաթոշակային համակարգը ներդնելու դեմ:
Ըստ օրենսդրության, այս տարվա հուլիսի 1-ին կուտակային կենսաթոշակային համակարգը պարտադիր պետք է դառնա բոլորի համար: Մինչ այդ այն պարտադիր էր միայն պետական ընկերությունների աշխատակիցների համար: