Թուրքիայի նախագահ Ռեջեփ Թայիփ Էրդողանի հարձակումները Իսրայելի վրա անկանխատեսելի հնարավորությունների շարք բացեցին ինչպես Վաշինգթոնում, այնպես էլ Երուսաղեմում՝ ժխտողականությունից հրաժարվելու եւ Հայոց ցեղասպանությունը ճանաչելու համար: Այս մասին Bloomberg-ի կայքում հրապարակված հոդվածում գրում է հայտնի լրագրող Զեեւ Շաֆեցը:
Նրա խոսքով՝ Թուրքիան շարունակում է հավատարիմ մնալ ցեղասպանության ժխտման քաղաքականությանը եւ պահանջում է, որ ուրիշները համաձայնեն այդ ստի հետ, որպես Իսրայելի եւ այլ երկրների հետ լավ հարաբերությունների գին:
Լրագրողը նշում է, որ գրեթե 30 երկիր ճանաչել է Հայոց ցեղասպանությունը, սակայն նրանց թվում չկան ԱՄՆ-ն եւ Իսրայելը:
Ըստ նրա՝ այս հարցի վերաբերյալ Իսրայելի լռությունը պրագմատիզմի հետ է կապված: Երբ Թուրքիան աշխարհիկ ու արեւմտամետ երկիր էր, Իսրայելը թշնամաբար տրամադրված արաբների շրջապատում նրան ապավինում էր որպես ռազմավարական գործընկերոջ: Սակայն հիմա, ըստ լրագրողի, ռացիոնալությունը այլեւս չի գործում, քանի որ «խալիֆ» Էրդողանը թշնամի է:
Զեւ Շաֆեցը շեշտում է, որ իշխող կոալիցիայից առնվազն հինգ նախարար պաշտպանում է Ցեղասպանության ճանաչումը, ինչպես նաեւ Կնեսետի նախագահն ու ընդդիմության խոշորագույն կուսակցությունների առաջնորդները:
«Այնուամենայնիվ, առանց Նեթանյահուի պատասխանի, ոչինչ չի փոխվի: Ոչ մի օրենսդրական նախաձեռնություն չի կարող անցնել առանց նրա համաձայնության, ինչպես եւ դիվանագիտական քաղաքականությունը չի կարող ընդունվել, քանի որ նա նաեւ Իսրայելի արտաքին գործերի նախարար է:
Նեթանյահուն ստրատեգ է, եւ Թուրքիան, դուր է գալիս դա ինչ-որ մեկի, թե ոչ, տարածաշրջանային խաղացող է: Նա պաշտոնապես կճանաչի Հայոց ցեղասպանությունը միայն այն դեպքում, եթե համարի, որ նման քայլը համապատասխանում է իր նպատակներին:
