Ամերիկյան դպրոցներում, բուհերում եւ այլ ուսումնական հաստատություններում 2009 թվականից ի վեր գրանցված հրաձգությունների դեպքերը 57 անգամով ավելի շատ են, քան «Մեծ յոթնյակի» (G7) անդամ պետությունների ուսումնական հաստատություններում ընդհանուր վերցված, փոխանցում է CNN-ը։
Համաձայն այդ տվյալնների՝ 2009 թվականի հունվարի 1-ից 2018 թվականի մայիսի 21-ը ընկած ժամանակահատվածում ԱՄՆ-ում գրանցվել է այդպիսի 288 դեպք, Կանադայում՝ 2, նույնքան Ֆրանսիայում եւ Գերմանիայում՝ մեկ դեպք։ Մեծ Բրիտանիայում, Իտալիայում եւ Ճապոնիայում այդպիսի միջադեպեր չեն գրանցվել։ CNN-ը պարզաբանում է, որ խոսքը այն դեպքերի մասին է, երբ ուսումնական հաստատության տարածքում կրակը բացած անձից բացի հրազենային վնասվածք է ստացել առնվազն մեկ մարդ, այդ թվում՝ պատահականությամբ։
Նյութում նշվում են նաեւ այլ պետություններում նշված ժամանակահատվածում գրանցված դեպքերի մասին տվյալները։ Այսպես, ԱՄՆ-ից հետո երկրորդ տեղում է Մեքսիկան, որտեղ գրանցվել է 8 այդպիսի դեպք։ Ապա հաջորդում է Հարավաֆրիկյան հանրապետությունը (6), Հնդկաստանը (5), Պակիստանը (4), Նիգերիան (4), Աֆղանստանը (3), Ֆրանսիան (2), Կանադան (2), Բրազիլիան (1): CNN-ի հաղորդմամբ՝ նշված ժամանակահատվածում ՌԴ-ում եւս գրանցվել է այդպիսի մեկ դեպք։
Համաձայն նյութի՝ այս տարի ամերիկյան ուսումնական հաստատություններում միջինում շաբաթը մեկ անգամ հրաձգություն է եղել։