Ադրբեջանը պետք է գիտակցի, որ առանց Լեռնային Ղարաբաղի անմիջական մասնակցության անհնար է հասնել ամուր խաղաղության: Այս մասին մայիսի 22-ին ճեպազրույցի ժամանակ հայտարարեց ՀՀ ԱԳՆ մամուլի քարտուղար Տիգրան Բալայանը:
Ըստ նրա՝ այն փաստը, որ հայկական կողմը պնդում է, որպեսզի Ղարաբաղի մասնակցությունը, ամենեւին նորություն չէ: Պարզապես այժմ փոխվել են իրողությունները, եւ դա ԼՂՀ-ի ավելի մեծ մասնակցություն է ենթադրում բանակցային գործընթացին»,- հավելեց Բալայանը: Անդրադառնալով մասնակցության մեխանիզմներին՝ Տիգրան Բալայանը հիշեցրեց, որ Լեռնային Ղարաբաղն այս կամ այն կերպ ներգրավված է բանակցություններում, կան բոլոր կողմերի մասնակցության անհրաժեշտության մասին փաստաթղթեր: «Ադրբեջանը հրաժարվում է ուղիղ բանակցել Ղարաբաղի հետ:
Սակայն Զինադադարի մասին համաձայնագիրը ուղիղ բանակցությունների արդյունք էր: Հիշենք նաեւ, որ Հեյդար Ալիեւը եւ Ռոբերտ Քոչարյանը հանդիպել են եւ նամակագրություն էին վարում: Այսօր մեր խնդիրն այն է, որպեսզի Բաքվի իշխանությունները, որոնք 2003 թվականից բանակցում են Ադրբեջանի անունից, գիտակցեն, որ արդյունքների հասնելու ուղին Ղարաբաղի անմիջական մասնակցությունն է բանակցություններին»,- ասաց Բալայանը: Ընդ որում, նա ընդգծեց, որ Հայաստանը, լինելով անվտանգության երաշխավոր, չի հրաժարվում մասնակցել բանակցություններին, սակայն Ղարաբաղի մասնակցությունը անհրաժեշտ պայման է տեւական եւ ամուր խաղաղության հասնելու համար:
«Հայաստանի դիրքորոշումը չի փոխվել: Մենք համարում ենք, որ խնդիրը պետք է կարգավորվի բացառապես խաղաղ միջոցներով՝ ԵԱՀԿ Մինսկի խմբի համանախագահների առաջարկությունների, ապրիլյան պատերազմից հետո ձեռք բերված պայմանավորվածությունների կատարման հիման վրա», - ընդգծեց Տիգրան Բալայանը: Նա հավելեց, որ ԵԱՀԿ Մինսկի խմբի համանախագահներն արդեն հայտարարել են, որ հունիսին մտադիր են այցելել Հայաստան եւ խոսել երկրի նոր ղեկավարության հետ: Այցի ժամկետները ճտշվում են: Ներկա պահինՀայաստանի եւ Ադրբեջանի արտգործնախարարների հանդիպման մասին պայմանավորվածություն չկա, նշեց Բալայանը:
Տիգրան Բալայանը նաեւ կտրականապես հերքեց տարածքների փոխանակման մասին խոսակցությունները: