Սեւծովյան առեւտրի եւ զարգացման բանկն ու Ամերիաբանկն այսօր՝ մայիսի 22-ին 15 մլն դոլարի վարկային պայմանագիր են կնքել՝ 5 տարի ժամկետով: Պայմանագրի նպատակն է՝ Հայաստանում զարգացնել փոքր եւ միջին բիզնեսը, որը երկրի տնտեսության առանցքն է կազմում:
ՓՄՁ հատվածին ուղղված աջակցությունը երկու բանկերի համար էլ միասնական նպատակ եւ առաջնահերթ խնդիր է: Տրամադրվող վարկային միջոցներն Ամերիաբանկին թույլ կտան Հայաստանում գործող ՓՄՁ-ներին առաջարկել երկարաժամկետ ֆինանսավորում, որը կենսականորեն անհրաժեշտ է վերջինների աճն ու մրցունակությունն ապահովելու եւ նոր աշխատատեղեր ստեղծելու համար:
«Ամերիաբանկի համար մեծ պատիվ է շարունակել արժեքավոր համագործությունը Սեւծովյան առեւտրի եւ զարգացման բանկի հետ: Կնքվող պայմանագիրն Ամերիաբանկին թույլ կտա ամրապնդել իր դիրքերը ՓՄՁ վարկավորման շուկայում եւ ավելի մեծ ներդրում ունենալ երկրի տնտեսության զարգացման գործում»,- նշել է Ամերիաբանկի գլխավոր տնօրեն Արտակ Հանեսյանը:
Սեւծովյան առեւտրի եւ զարգացման բանկի բանկային գործառնությունների գծով փոխնախագահ Իգոր Լեշուկովն իր հերթին նշել է. «Սա Սեւծովյան առեւտրի եւ զարգացման բանկի կողմից Ամերիաբանկին ՓՄՁ ֆինանսավորման նպատակով տրամադրվող թվով երկրորդ վարկային գործիքն է: Մենք ուրախ ենք շարունակել համագործակցությունը շուկայի առաջատարի հետ եւ իրականացնել Հայաստանի համար մշակված մեր ռազմավարական ծրագրերը՝ հնարավորություն տալով բանկին զարգացնել երկրի տնտեսությունը եւ հատկապես ՓՄՁ ոլորտը»: