Մեզ մոտ լուրջ ակնկալիքներ են ձեւավորվել Իսրայելի առեւտրաարդյունաբերական պալատում հանդիպումների ընթացքում, երբ պալատի ներկայացուցիչները բավական մեծ հետաքրքրություն էին սկսել տածել Հայաստանում բարձր տեխնոլոգիաների ոլորտում առաջընթացին: Այս մասին, այսօր՝ մայիսի 22-ին, ԱԺ-ում հայտարարեց Հայաստան-Իսրայել բարեկամական խմբի անդամ, ՀՀԿ-ական պատգամավոր Գագիկ Մելիքյանը՝ անդրադառնալով Իսրայել կատարած իրենց վերջին այցին:
«Բավական հետաքրքիր առաջարկություններ էին հնչում իսրայելական ընկերությունների կողմից հատկապես ազատ առեւտրի գոտիներում, որոնք ԵՏՄ անդամ Հայաստանը փորձում է իրականացնել ոչ միայն Իրանի հետ սահմանին, այլեւ Շիրակում: Նրանք լուրջ ծրագրեր են փորձում իրականացնել վերջին մեկ տարվա ընթացքում»,-ասաց նա:
Գագիկ Մելիքյանը տեղեկացրեց, որ Իսրայելում հանդիպումների ժամանակ խոսել են նաեւ ռազմական համագործակցության եւ ռազմաարդյունաբերական տեխնիկական միջոցների ներդրման, արտադրություն կազմակերպելու, գնումների հետ կապված. «Որեւէ խոչընդոտ Իսրայելի կողմից չէր ներկայացվում: Բարձրացվեց նաեւ Իսրայելի կողմից Ադրբեջանին զենք վաճառելու հարցը, պատասխանը միանշանակ էր եւ հայտնի՝ իրականացվում է բիզնես գործընթաց, ցանկության դեպքում ցանկացած երկիր կարող է Իսրայելի հետ կարող է իրականացնել նույնատիպ գործընթաց»,-ասաց պատգամավորը:
ԱԺ փոխնախագահ Էդուարդ Շարմազանովն էլ արձագանքեց. «Հանցագործ պետությանը զենք վաճառելը լավ բան չի, անկախ նրանից՝ Իսրայելն է, թե այլ պետություն»:
