ԱՄՆ պետքարտուղար Մայք Պոմպեոն իր ոգեւորությունն է հայտնել Հայաստանում խաղաղ եւ սահմանադրական իշխանափոխության կապակցությամբ:
Ամերիկայի Հայ Դատի հանձնախմբին (ANCA) ուղղված նամակում Պոմպեոն վերահաստատել է հայ ժողովրդի հետ Ամերիկայի հարաբերությունների բարեկամական բնույթը` խոստանալով ընդհանուր շահերի առաջխաղացման համար աշխատել Հայաստանի նոր կառավարության հետ:
Նամակն ուղղվել է ի պատասխան Ամերիկայի Հայ Դատի հանձնախմբի կոչին՝ Պոմպեոյին, որպես «Հազարամյակի մարտահրավերներ» ծրագրի խորհրդի նախագահի, աջակցել Հայաստանի 140 մլն գումարի դրամաշնորհի տրամադրմանը, որն ուղղվելու է գիտության, տեխնոլոգիաների, ինժեներիայի, արվեստի, մաթեմատիկայի ոլորտների ծրագրերին:
Նամակում Պոմպեոն նշել է, որ գնահատում է Հայաստանում կրթական ծրագրերի վրա կենտրոնանալու գաղափարը, սակայն հավելել է, որ կորպորացիան դրամաշնորհների արագացված քննարկման համար ֆորմալ գործընթաց չունի:
«Հուսով ենք, որ այս տարի Հայաստանի կառավարությունը առաջընթացի կհասնի «Հազարամյակի մարտահրավերների» չափանիշների առումով, որպեսզի տնօրեների խորհուրդը կարողանա տարեկան ընտրման գործընթացում Հայաստանի հարցը քննարկել», - ասել է Պոմպեոն:
