Ռուսաստանի արտգործնախարար Սերգեյ Լավրովը Հայաստանի Հանրապետության արտաքին գործերի նոր նախարար Զոհրաբ Մնացականյանի հետ հեռախոսազրույցի ընթացքում քննարկել է դաշնակցային փոխգործակցության հարցեր եւ Լեռնային Ղարաբաղի հակամարտության կարգավորման հետ կապված շփումները: Այս մասին նշվում է Ռուսաստանի արտգործնախարարության հրապարակած հայտարարության մեջ:
«Մայիսի 23-ին հայկական կողմի նախաձեռնությամբ հեռախոսազրույց է տեղի ունեցել Ռուսաստանի ԱԳ նախարար Սերգեյ Լավրովի եւ Հայաստանի արտգործնախարար Զոհրաբ Մնացականյանի միջեւ: Քննարկվել են դաշնակցային փոխգործակցության արդի հիմնախնդիրները, այդ թվում՝ հունիսի 1-ին Դուշանբեում կայանալիք ԱՊՀ երկրների կառավարությունների ղեկավարների խորհրդի նիստի եւ հունիսի 11-ին Ալմաթիում կայանալիք ՀԱՊԿ ԱԳ նախարարների խորհրդի նիստի նախապատրաստական աշխատանքները, ինչպես նաեւ՝ ԵԱՏՄ կառույցների գործունեությունը»,- նշվում է հայտարարության մեջ:
Գերատեսչության տարածած հաղորդագրության մեջ նաեւ նշվում է, որ նախարարները քննարկել են երկկողմ միջոցառումների ժամանակացույցը, ինչպես նաեւ ԵԱՀԿ Մինսկի խմբի համանախագահների միջոցով ղարաբաղյան հակամարտության կարգավորման պլանավորված շփումները: